فرمان الہی
نماز کے اوقات
لاہور اور شیخو پورہ میں 2 ٹریفک حادثات پیش آئے ہیں جن کے نتیجے میں 4 افراد جاں بحق جبکہ 5 افراد زخمی ہو گئے۔
پولیس کے مطابق لاہور کے علاقے بتی چوک راوی روڈ پر ٹرالر نے موٹر سائیکل کو ٹکر مار دی جس کے نتیجے میں باپ جاں بحق ہو گیا جبکہ اس کا بیٹا زخمی ہوا ہے۔
جاں بحق ہونے والا نعیم نامی شخص اپنے بیٹے امین کے ساتھ شاہدرہ جا رہا تھا کہ حادثے کا شکار ہو گیا، زخمی امین کو اسپتال منتقل کر دیا گیا ہے۔
پولیس کے مطابق ٹرالر کا ڈرائیور موقع سے فرار ہو گیا جبکہ ٹرالر کو قبضے میں لے کر ہیلپر کو گرفتار کر لیا گیا ہے۔
دوسری جانب شیخو پورے میں موٹروے پر خانقاہ ڈوگراں انٹر چینج کے قریب ایک سوزوکی وین ٹائر برسٹ ہونے کی وجہ سے بے قابو ہو کر اُلٹ گئی اور قلابازیاں کھاتی ہوئی دور جا گری۔
وین پر سوار 1 ہی خاندان کے 3 افراد 25 سالہ حنا بی بی اس کی 2 کمسن بیٹیاں 3 سالہ رانی اور 8 ماہ کی فاطمہ جاں بحق ہو گئیں جبکہ 4 افراد خاتون کا شوہر صابر اس کی 4 سالہ بیٹی حریم، 2 سالہ بیٹے حسن کے علاوہ ڈرائیور سلیمان زخمی ہوگئے۔
جاں بحق ہونے والوں اور زخمیوں کو ایف ڈبلیو کے اہلکاروں نے ڈسٹرکٹ ہیڈ کوارٹر اسپتال شیخوپورہ منتقل کر دیا ہے۔
بتایا گیا ہے کہ حادثے کا شکار ہونے والا خاندان چنیوٹ میں رشتے داروں سے مل کر واپس سیالکوٹ آ رہا تھا کہ ان کی گاڑی حادثے کا شکار ہو گئی۔
پولیس کے مطابق حادثے کا شکار ہونے والے خاندان کے یہ افراد کوٹلی بہرام محلہ مسلم پورہ سیالکوٹ کے رہائشی ہیں۔
