آپ آف لائن ہیں
جمعرات10؍ربیع الثانی 1442ھ26؍نومبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

کراچی طیارہ حادثے کے متاثرین کو معاوضے کی ادائیگی کل سے شروع ہوگی


کراچی کے علاقے ماڈل کالونی میں رواں سال عیدالاضحیٰ سے ایک روز قبل پیش آنے والے طیارہ حادثے کے متاثرین کو معاوضے کی ادائیگی کا سلسلہ کل سے شروع کیا جائے گا، پہلے مرحلے میں 5 متاثرین کو ایک، ایک کروڑ روپے دیئے جائیں گے۔

ذرائع کا کہنا ہے کہ طیارہ حادثے کے متاثرین کو معاوضے کی ادائیگی کل سے شروع ہوگی، قانونی دستاویزات مکمل کرنے والے متاثرین اور لواحقین کو ادائیگی کی جارہی ہے۔

پہلے مرحلے میں پانچ متاثرین کو ایک ایک کروڑ روپے معاوضہ ملے گا، جبکہ زندہ بچ جانے والے مسافروں محمد زبیر اور ظفر مسعود کوفی کس ایک کروڑ روپے دیئے جائیں گے۔

ذرائع کا کہنا ہے کہ جاں بحق تین مسافروں کے لواحقین کو بھی ایک، ایک کروڑ روپےکی ادائیگی ہوگی، طیارہ گرنے سے زمین پر متاثر 22 خاندانوں کو بھی 2 کروڑ 80  لاکھ روپے معاوضہ ملے گا۔

ذرائع کا کہنا ہے کہ یہ معاوضہ 14 گاڑیوں اور گھر کا سامان جلنے یا ضائع ہونے کی مد میں دیا جا رہا ہے، 22 خاندانوں کے گھروں کو پہنچنے والے نقصان کی ادائیگی بعد میں کی جائے گی۔


ذرائع کا کہنا ہے کہ پی آئی اے نے زمین پر متاثرہ 22 خاندانوں کو چھ ماہ کا کرایہ بھی دیا ہے، جبکہ 97 جاں حق مسافروں کے لواحقین کو فی کس دس دس لاکھ روپے ادا کیے جاچکے اور زمین پر جاں بحق1خاتون کو 10 لاکھ اور 3 زخمیوں کو پانچ پانچ لاکھ روپے ادائیگی ہوچکی ہے۔

معاوضے کی ادائیگی پی آئی اے اور انشورنس کمپنی میں معاملات طے پانے پر شروع کی گئی۔

طیارہ حادثہ 22 مئی کو ایئرپورٹ کے قریب پیش آیا تھا، طیارہ حادثے میں 97 مسافر اور زمین پر ایک خاتون جاں بحق ہوئی تھیں۔

قومی خبریں سے مزید