جو بائیڈن ٹوئٹر پر کتنے مقبول؟

23 نومبر ، 2020

امریکی صدارتی انتخابات میں کامیابی حاصل کرنے کے بعد امریکا کے صدر منتخب ہونے والے جو بائیڈن نے کچھ ہی دنوں میں سوشل میڈیا پر بھی اپنی مقبولیت کے جھنڈے گاڑ دیے ہیں۔

74 سالہ ڈونلڈ ٹرمپ کو شکست دے کر امریکا کے 46ویں صدر منتخب ہونے والے 77 سالہ جوبائیڈن کو جہاں دُنیا بھر میں مقبولیت مل رہی ہے تو وہیں مائیکرو بلاگنگ سائٹ ٹوئٹر پر موجود جوبائیڈن کے تصدیق شدہ اکاؤنٹ پر اُنہیں 19 اعشاریہ 5 ملین صارفین نے فالو کرلیا ہے۔

ہر گُزرتے دن کے ساتھ ٹوئٹر پر جوبائیڈن کے چاہنے والوں میں تیزی سے اضافہ ہورہا ہے اور وہ دن دور نہیں کہ جب 20 ملین ٹوئٹر جوبائیڈن کو فالو کرلیں گے۔

اگر ہم جوبائیڈن کے ٹوئٹر اکاؤنٹ کا جائزہ لیں تو اُنہوں نے صرف 30 لوگوں کو اپنے تصدیق شدہ اکاؤنٹ سے فالو کیا ہوا ہے جن میں اُن کی اہلیہ، امریکا کی نو متخب نائب صدر کملا ہیرس سمیت اُن کے دیگر عزیز و اقارب شامل ہیں۔

دوسری جانب فوٹو اینڈ ویڈیو شیئرنگ ایپ انسٹاگرام پر موجود جوبائیڈن کے اکاؤنٹ کو اب تک 13 اعشاریہ 8 ملین صارفین نے فالو کرلیا ہے جبکہ جوبائیڈن نے صرف 100 لوگوں کو انسٹاگرام پر فالو کیا ہوا ہے۔