شہبازگل کی عدالت میں پیشی پر بدنظمی

وزیرِ اعظم عمران خان کے معاونِ خصوصی شہباز گِل اپنے خلاف توہین عدالت کے کیس کی سماعت کے موقع پر لاہور کی عدالت میں پیش ہوئے، اس موقع پر بد نظمی کا مظاہرہ دیکھنے میں آیا۔

عدالت سے واپسی پر نون لیگی کارکنوں نے شہبازگِل کے خلاف نعرے لگائے۔

نون لیگی کارکنوں نے شہباز گِل کی گاڑی کے سامنے آنے کی کوشش کی جنہیں پولیس نے ہٹا دیا۔

اس موقع پر میڈیا سے گفتگو کرتے ہوئے شہباز گِل نے الزام عائد کیا کہ نون لیگی کارکنوں نے میری گاڑی پر پیچھے سے حملہ کیا۔

انہوں نے کہا کہ مجھے عدالت کا پہلا سمن ملا اور میں حاضر ہو گیا ہوں، عدالتوں کا احترام ہماری پارٹی کی پالیسی ہے، امریکا تو مجھے جانا نہیں، پڑھانے کا کام چھوڑ آیا ہوں۔

شہباز گِل نے اورنج لائن منصوبہ ناکام قرار دیدیا

‏وزیرِ اعظم عمران خان کے معاونِ خصوصی شہباز گِل اورنج لائن منصوبے پر تنقید کرتے ہوئے کہتے ہیں کہ پنجاب حکومت کو اسے یومِ سوگ ڈیکلیئر کرنا چاہیے، یہ ناکام منصوبہ ہے۔

شہباز گِل نے کہا کہ میٹرو بس کمپنی ہماری حکومت میں کم پیسوں پر سروس فراہم کر رہی ہے، اب فرق صرف اتنا ہے کہ اوپر چور نہیں، عمران خان بیٹھا ہوا ہے۔

انہوں نے کہا کہ اس کمپنی نے میرے اوپر توہینِ عدالت کا کیس کیا ہوا ہے، اس کمپنی کا معاہدہ 3 اعشاریہ 8 صفر فی کلو میٹر کا تھا، یہی کمپنی اب 1 اعشاریہ 86 فی کلو میٹر پر بس چلا رہی ہے، یہی کمپنی اب عوام کو 1 اعشاریہ 94 فی کلومیٹر کا فائدہ دے رہی ہے۔

شہباز گِل نے کہا کہ میں نے یہی سوال پوچھا ہے کہ پہلے 1 اعشاریہ 94 فی کلومیٹر کہاں جا رہے تھے، کیا یہ سلمان شہباز کے پاس جا رہے تھے یا کسی اور کے پاس جا رہے تھے؟

انہوں نے کہا کہ میں اپنے وکلاء سے کہوں گا کہ اس کمپنی کے اکاؤنٹس اور سارے کوائف منگوائے جائیں، وکلاء سے کہوں گا کہ سلمان شہباز کو بھی عدالت میں پیش کرنے کا کہیں، تاکہ پتہ چل سکے کہ عمران خان کے آنے کے بعد دس بیس نہیں بلکہ ریٹ میں سو فیصد کمی آئی ہے۔

شہباز گِل کا کہنا ہے کہ شہباز شریف نے لاہور میں میٹرو بسیں چلانے کیلئے بہت مہنگا ٹھیکہ دیا، ٹھیکے کی بات کرنے پر میرے خلاف شہباز شریف کی من پسند کمپنی نے کیس کر دیا، وزیرِاعظم عمران خان کے حکم پر عوامی پیسے کو بچایا جا رہا ہے۔

انہوں نے کہا کہ شہباز شریف نے من پسند کمپنی کو ٹھیکہ دیا جس پر حقائق ٹی وی پر بتائے، میٹرو بسوں پر شہباز شریف نے انتہا کی کرپشن کی جس پر حقائق سامنے لایا۔

وزیرِ اعظم کے معاونِ خصوصی نے یہ بھی کہا کہ شہباز شریف نے جب ٹھیکہ دیا تو ایک کمپنی نے ٹینڈر بھرا، اب تحریکِ انصاف کی حکومت میں 3 کمپنیاں بولی میں شامل ہوئیں، ہماری حکومت نے میٹرو بس کے ٹینڈر انتہائی کم قیمت میں دیئے۔

شہباز گِل کے وکیل نے سیشن عدالت میں میڈیا سے گفتگو کرتے ہوئے کہا کہ میٹرو بس کمپنی نے عمران خان کے دور میں کم قیمت پر معاہدہ کیا ہے، کمپنی نے ماضی کی حکومت سے زیادہ ریٹ پر معاہدہ کیا تھا۔

انہوں نے کہا کہ میٹرو بس کمپنی نے بلیک میل کرنے کے لیے عدالت میں درخواست دائر کی ہے، ہم ان کو جواب دیں گے اور بے نقاب کریں گے۔