وزیراعظم عمران خان کی فارن فنڈنگ کیس پر قوم کو حقائق بتانے کی ہدایت

11 جنوری ، 2021

وزیراعظم عمران خان نے حکومتی اور پارٹی ترجمانوں کو فارن فنڈنگ کیس کے حقائق قوم کے سامنے رکھنے کی ہدایت کی اور کہا کہ اس ایشو پر اپوزیشن کے پراپیگنڈے کو کاؤنٹر کریں۔

وزیراعظم عمران خان کی زیر صدارت حکومتی اور پارٹی ترجمانوں کا اجلاس ہوا۔

ذرائع کے مطابق اجلاس میں سینیٹ انتخابات، فارن فنڈنگ کیس، سانحہ مچھ اور براڈ شیٹ پر گفتگو کی گئی۔

اجلاس میں الیکشن کمیشن کے باہر اپوزیشن کے احتجاج کے معاملے پر بھی حکمت عملی ترتیب دی گئی۔

ذرائع کے مطابق وزیراعظم عمران خان کے معاون خصوصی برائے اوورسیز پاکستانیز زلفی بخاری نے سانحہ مچھ اور لواحقین سے مذاکرات پر اجلاس کے شرکاء کو بریفنگ دی۔

یہ بھی پڑھیے

وزیراعظم نے سانحہ مچھ کو انتہائی افسوسناک قرار دیا اور کہا کہ مستقبل میں ایسے واقعات کے تدارک کے لیے اقدامات کررہے ہیں۔

انہوں نے شرکاء پر واضح کیا کہ سانحہ مچھ کے مجرموں کو کیفر کردار تک پہنچائیں گے کیونکہ ایسے مجرم کسی بھی رعایت کے مستحق نہیں ہیں۔

ذرائع کے مطابق دوران اجلاس وزیراعظم نے فروری یا مارچ میں متوقع سینیٹ انتخابات سے متعلق حکمت عملی بنانے کی ہدایت بھی دی۔

عمران خان نے کہا کہ سینیٹ انتخابات میں بھی ہم کامیابی حاصل کریں گے۔

وزیراعظم نے حکومتی اور پارٹی ترجمانوں کو فارن فنڈنگ کیس کے حقائق قوم کے سامنے رکھنے کی ہدایت کی اور کہا کہ اس ایشو پر اپوزیشن کے پراپیگنڈے کو کاؤنٹر کریں۔

انہوں نے کہا کہ الیکشن کمیشن میں ہمارے جواب اور اپوزیشن کے کیس پر حقائق قوم کو بتائے جائیں۔

عمران خان نے ترجمانوں سے کہا کہ وہ براڈ شیٹ کے دعویٰ کو عوام میں اجاگر کریں کہ سابق وزیراعظم نواز شریف نے براڈ شیٹ کو بھی خریدنے کی کوشش کی۔

ان کا کہنا تھا کہ ترجمان ٹاک شوز میں حکومتی حکمت عملی اور اپوزیشن کے پراپیگنڈے سے متعلق عوام کو آگاہ کریں۔

تازہ ترین