انتہائی اہمیت کی ویڈیو سامنے آئی ہے: کنور دلشاد

10 فروری ، 2021

2009ء میں ہارس ٹریڈنگ کی شکایت آئی مگر ثبوت نہیں ملے: کنور دلشاد

سینیٹ انتخابات میں مبینہ طور پر ووٹ فروخت کرنے والے خیبر پختون خوا اسمبلی کے اراکین کی منظر عام پر آنے والی ویڈیو کے حوالے سے سابق سیکریٹری الیکشن کمیشن کنور دلشاد کا کہنا ہے کہ انتہائی اہمیت کی ویڈیو سامنے آئی ہے۔

’جیو نیوز‘ کے مارننگ شو ’جیو پاکستان‘ میں گفتگو کرتے ہوئے سابق سیکریٹری الیکشن کمیشن نے کہا کہ 2009ء میں ہمارے پاس اس طرح کی شکایت آئی تھی۔

کنور دلشاد نے کہا کہ اس وقت انکوائری کی تو ثبوت سامنے نہیں آئے، اب انتہائی اہمیت کی ویڈیو سامنے آئی ہے۔

انہوں نے کہا کہ وزیرِ اعظم عمران خان کا ہمیشہ بیان آتا رہا ہے کہ سینیٹ الیکشن میں ہارس ٹریڈنگ ہوتی ہے، ہارس ٹریڈنگ میں کروڑوں اربوں روپیہ تقسیم ہوا ہے۔

کنور دلشاد نے کہا کہ اس معاملے کو منطقی انجام تک پہنچانے کیلئے ضروری ہے کہ الیکشن کمیشن کو تمام دستاویزات، ویڈیو کے ساتھ ریفرنس کی صورت میں اور 2017ء کے الیکشن ایکٹ سیکشن 167، 168، 169 اور 170 کے تحت داخل کر دیں۔

انہوں نے کہا کہ یہ معاملہ رشوت کے زمرے میں آتا ہے، الیکشن ایکٹ 2017ء کے سیکشن 167، 168، 169، 170 میں لکھا ہے کہ جو بھی رشوت کے ذریعے الیکشن میں مداخلت کرتا ہے وہ قومی مجرم ہے۔

سابق سیکرٹری الیکشن کمیشن کنور دلشاد کا مزید کہنا ہے کہ ان سیکشنوں میں لکھا ہےکہ الیکشن کمیشن انہیں نااہل قرار دینے کے ساتھ 3 سال کی سزا بھی دے سکتا ہے۔

انہوں نے یہ بھی کہا کہ ایسے افراد کے خلاف الیکشن کمیشن ایف آئی آر درج کرانے کا بھی مجاز ہے، نا اہل قرار پانے والا 5 سال تک الیکشن میں بھی حصہ لینے کا مجاز نہیں۔

واضح رہے کہ 2018ء کے سینٹ انتخابات میں مبینہ طور پر ووٹ فروخت کرنے والے خیبر پختون خوا اسمبلی کے اراکین کی ویڈیو منظر عام آگئی ہے۔

خیبر پختون خوا کابینہ کے موجودہ وزیرِ قانون سلطان محمد بھی 2018ء کے سینیٹ انتخابات میں ہارس ٹریڈنگ میں ملوث نکلے ہیں۔

یہ بھی پڑھیے

مبینہ طور پر منظرِ عام پر آنے والی ویڈیو میں وزیرِ قانون سلطان محمد کو بھی رقم لیتے ہوئے دیکھا جا سکتا ہے۔

وزیرِ اعظم عمران خان نے ویڈیو کا نوٹس لیتے ہوئے وزیرِ اعلیٰ خیبر پختون خوا محمود خان کو فوری کارروائی کرنے اور وزیرِ قانون کو عہدے سے ہٹانے کا حکم دیا جس پر وزیرِ اعلیٰ محمود خان نے وزیرِ قانون سلطان محمد سے فوری طور پر استعفیٰ طلب کرتے ہوئے معاملے کی شفاف انکوائری کا حکم دیا ہے۔

بعد ازاں سلطان محمد خان نے عہدے سے مستعفی ہو کر اپنا تحریری استعفیٰ وزیرِاعلیٰ کو ارسال کر دیا جس کے بعد وزیراعلیٰ خیبر پختون خوا محمود خان نے ان کا استعفیٰ منظور کر لیا۔

دیئے گئے استعفے میں سلطان محمد نے کہا ہے کہ ایک ویڈیو منظرِ عام پر آئی ہے جس میں میرا بھی ذکر کیا گیا ہے، لہٰذا یہ میری ذمے داری ہے کہ میں کابینہ سے الگ ہو کر استعفیٰ دے دوں۔

تازہ ترین