دورۂ جنوبی افریقا، زمبابوے کیلئے قومی اسکواڈ کا اعلان 10 مارچ کو ہوگا ‏

قومی کرکٹ سلیکشن کمیٹی نے ‏ دورۂ جنوبی افریقا اور زمبابوے کیلئے کرکٹ ٹیم کے اسکواڈ کا اعلان 10 مارچ تک کیے جانے کا پلان تیار کیا ہے۔

ذرائع کے مطابق ‏وائٹ بال اور ریڈ بال کرکٹ کیلئے ایک ساتھ ہی اسکواڈ کا اعلان کرنے کا منصوبہ بنایا گیا ہے، اسکواڈ 30 کھلاڑیوں پر مشتمل ہو سکتا ہے۔

پاکستان کرکٹ بورڈ(پی سی بی) قومی اسکواڈ کو ایک ساتھ چارٹر فلائٹ سے جنوبی افریقا لے جانا چاہ رہا ہے۔

پاکستانی ٹیم چارٹرڈ طیارے سے جنوبی افریقا جائیگی

پاکستان کرکٹ ٹیم تین ون ڈے اور چار ٹی میچوں کی سیریز کھیلنے اس ماہ کی 27تاریخ کو چارٹر طیارے کے ذریعے جنوبی افریقا روانہ ہوگی، چارٹر طیارے کے اخراجات پاکستان کرکٹ بورڈ ادا کرے گا۔

قومی ٹیم نے جنوبی افریقا میں ون ڈے اور ٹی ٹوئنٹی میچز کی سیریز کھیلنا ہے جبکہ زمبابوے میں ٹیسٹ اور ٹی ٹوئنٹی میچز شیڈول ہیں۔

واضح رہے کہ پاکستان ٹیم کو دورۂ جنوبی افریقا کیلئے 27 مارچ کو روانہ ہونا ہے۔