رکھتے ہیں جاں نثار قیامت کی آرزو
ہے تشنگی میں جامِ شہادت کی آرزو
وہ قتل گاہ آگئے گھر بار چھوڑ کر
جن جن کو تھی جہاد میں شرکت کی آرزو
مطلوب تھی امام کو خوشنودیٔ خدا
دولت کی آرزو تھی نہ طاقت کی آرزو
زینب کے لاڈلے ابھی نو عمر تھے مگر
میدان میں تھی دادِ شجاعت کی آرزو
حُر کا نصیب تھا کہ اُسے عین وقت پر
القا ہوئی حسین سے نسبت کی آرزو
انسان سُرخرو رہے باطل کے سامنے
یہ آرزو ہے رفعت و عظمت کی آرزو
حاصل متاعِ درد ہو جس خوش نصیب کو
وہ کیوں کرے نشاط و مسّرت کی آرزو
بیکار ہے شعورؔ کوئی اور اشتہا
کافی ہے نیک نامی و عزت کی آرزو