بھارت میں سیکیورٹی گارڈ کی تیزی اور حاضر دماغی نے کوریئر ڈلیور کرنے والے شخص کی موٹرسائیکل چوری ہونے سے بچالی۔
بھارتی میڈیا کے مطابق دہلی میں دو افراد خود کو میونسپل حکام ظاہر کر کے ایک کالونی میں داخل ہوئے اور کوریئر ڈلیور کرنے والے شخص کی موٹرسائیکل چوری کرنے کی کوشش کی۔
موٹرسائیکل چوری کرنے کی واردات اور گیٹ پر موجود سیکیورٹی گارڈ کی حاضر دماغی سی سی ٹی وی کیمرے نے قید کرلی۔
ویڈیو میں دیکھا جاسکتا ہے کہ موٹرسائیکل چوری کر کے بھاگنے والے چور سیکیورٹی گارڈ کے گیٹ بند کرنے کے دوران گیٹ سے ٹکرا کر گر جاتے ہیں۔
بھارتی میڈیا کے مطابق ایک ملزم کو اُسی وقت موقع پر موجود لوگ پکڑ لیتے ہیں جبکہ اس کا ساتھی فرار ہونے میں کامیاب ہوجاتا ہے جسے کچھ دیر بعد گرفتار کرلیا جاتا ہے۔