اردن کی ملکہ رانیہ نے فلسطین میں مساجد کو نشانہ بنانے کی سخت مذمت کی ہے۔
غیرملکی میڈیا کے مطابق قطر میں منعقد ہونے والی مشرق وسطیٰ کی پہلی ویب سمٹ میں اردن کی ملکہ رانیہ نے تقریب کے پہلے دن کے اختتام پر خصوصی خطاب کیا۔
انہوں نے اپنے خطاب کے ابتدا میں نئی ڈیجیٹل ٹیکنالوجیز کے کردار کو اجاگر کرنے کے حوالے سے بات کی۔
اردن کی ملکہ رانیہ نے کہا کہ ہر سیلفی، اسٹیٹس اپ ڈیٹ، تصویر اور ویڈیو جو ہم شیئر کرتے ہیں وہ اس کہانی میں چند مزید لفظوں کا اضافہ کرتے ہیں جو ہم اپنے بارے میں مسلسل لکھتے رہتے ہیں۔
انہوں نے کہا کہ کچھ کہانیاں سوشل میڈیا کے منظر نامے کے پس منظر میں جا کر دھندلی ہو جاتی ہیں اور بھلا دی جاتی ہیں خاص طور پر فلسطین کے بارے میں۔
اردن کی ملکہ رانیہ نے کہا کہ فلسطین کی کہانی کو لوگوں کی نظروں اور دماغوں سے باہر دھکیل دیا گیا ہے، بہت طویل عرصے سے فلسطینیوں کو انسان ہی نہیں سمجھا گیا اور انہیں بدنام کیا گیا ہے۔
ان کا کہنا تھا کہ فلسطینیوں کو ایک ایسی قوم میں تبدیل کردیا گیا ہے جن کے ساتھ کچھ بھی کیا جا سکتا ہے۔
اردن کی ملکہ رانیہ نے کہا کہ یہ کہانی 7 اکتوبر سے بھی بہت آگے کی ہے، تبدیلی مسلسل جدوجہد سے ہی آسکتی ہے، جنگ اب ختم ہونی چاہیے۔
واضح رہے کہ اس سے قبل بھی کئی مرتبہ اردن کی ملکہ رانیہ فلسطین کی حمایت اور عالمی دنیا کی اس معاملے پر خاموشی سے متعلق بات کر چکی ہیں۔