عمران خان دورۂ روس میں یوکرین کا معاملہ اٹھائیں، یوکرینی سفیر

پاکستان میں یوکرین کے سفیر مارکیان چوچک کا کہنا ہے کہ وزیر اعظم عمران خان دورۂ روس میں روسی قیادت کیساتھ یوکرین کا معاملہ اٹھائیں۔

اسلام آباد میں میڈیا بریفنگ کے دوران یوکرین کے سفیر مارکیان چوچک نے کہا کہ پاکستان جوہری طاقت ہے اسے مسئلے کے حل کے لیے اپنا کردار ادا کرنا چاہیے۔

انہوں نے کہا کہ روس یوکرین پر حملہ کر کے قبضہ کرنا چاہتا ہے، جنگ کے بہانے بنا کر روس فالس فلیگ آپریشن کرسکتا ہے۔

ان کا یہ بھی کہنا ہے کہ روسی حملے سے پوری دنیا میں کشیدگی پھیل جائے گی، روس تمام تصفیہ طلب مسائل کا بات چیت سے حل نکالے۔

خیال رہے کہ روس نے یوکرین کے دو کریملن حمایت یافتہ علیحدگی پسند علاقوں میں روسی فوج تعینات کرنے کا اعلان کیا ہے۔