وزیرِ اعظم شہباز شریف کا کہنا ہے کہ پاکستان کا قیام کسی معجزے سے کم نہیں تھا۔

پاکستان کے 75 ویں یومِ آزادی کے موقع پر قوم کے نام پیغام میں وزیرِ اعظم شہباز شریف نے کہا کہ 75 واں یومِ آزادی پاکستانی قوم کے لیے ایک تاریخی دن ہے۔

انہوں نے کہا کہ قیامِ پاکستان بابائے قوم قائدِ اعظم کی انتھک محنت اور جدوجہد سے ممکن ہوا۔

آج کا دن لاتعداد قربانیوں کی یاد دلاتا ہے، صدر

یوم آزادی پر اپنے پیغام میں صدر عارف علوی کا کہنا تھا کہ افواج پاکستان اور قانون نافذ کرنے والے اداروں کی قربانیاں نہیں بھولیں گے۔

شہباز شریف کا کہنا ہے کہ 75 واں یومِ آزادی اجتماعی اور انفرادی سطح پر خود احتسابی کا بھی ایک موقع ہے۔

وزیرِ اعظم نے کہا کہ شروع دن سے ملک کو مصائب کا سامنا رہا مگر قوم کے جذبے کے آگے تمام مصائب گھٹنے ٹیکتے گئے۔

ان کا یہ بھی کہنا ہے کہ  سماجی و معاشی برابری، قانون کی حکمرانی اور مساوات پر مبنی مملکتِ کا خواب ہمارے آباؤ اجداد نے دیکھا تھا، ہم اس خواب کو ابھی تک مکمل شرمندۂ تعبیر نہیں کر سکے۔

جشن آزادی آج ملی جوش و جذبے کے ساتھ منایا جا رہا ہے

جشن آزادی پر مزار قائد پر گارڈ کی تبدیلی کی پروقار تقریب ہوئی، پاکستان نیول اکیڈمی کے کیڈٹس نے مزار قائد پر اعزازی گارڈ کے فرائض سنبھال لیے ہیں۔

اس سے قبل ایک بیان میں صدرِ مملکت عارف علوی نے کہا کہ آج کا دن مادر وطن کے حصول کے لیے قائدِ اعظم کی قیادت میں لاتعداد قربانیوں کی یاد دلاتا ہے۔

صدر عارف علوی کا یہ بھی کہنا ہے کہ افواج پاکستان اور قانون نافذ کرنے والے اداروں کی قربانیاں نہیں بھولیں گے۔

جشنِ آزادی ملی جوش و جذبے کیساتھ منایا جا رہا ہے

واضح رہے کہ ملک بھر میں آج 75 واں جشن آزادی ملی جوش و جذبے کے ساتھ منایا جا رہا ہے۔

دن کے آغاز پر توپوں کی سلامی دی گئی، اس موقع پر فضا نعرۂ تکبیر سے گونج اٹھی۔

نمازِ فجر میں ملکی ترقی، یک جہتی، امن اور خوش حالی کے لیے خصوصی دعائیں کی گئیں۔