فرمان الہی
نماز کے اوقات
کراچی( اسٹاف رپورٹر) ایشیا کپ کے میزبان پاکستان کرکٹ بورڈ کی کوشش رنگ لے آئیں۔ایشین کرکٹ کونسل نےاتوار کو کولمبو میں پاک بھارت میچ میں بارش سے متاثر ہونے پر اسے اگلے دن کرانے کا فیصلہ کرلیا، دونوں ٹیموں کا پہلا میچ بھی بارش کی وجہ سے مکمل نہیں ہوسکا تھا، پاکستان نے بارش کی پیشگوئی اور ایونٹ کی ری شیڈولنگ کے حوالے تحفظات کا اظہار کیا تھا اور اب پی سی بی کے تحفظات اور اعتراضات کے بعد اے سی سی نے ریزرو ڈے کا فیصلہ کیا ہے۔پاکستان اور بھارت کے درمیان ایشیا کپ میں 10 ستمبر کو ہونے والے میچ کا ریزرو ڈے بھی ہو گا، اگر 10 ستمبر کو میچ مکمل نہیں ہوتا تو یہ میچ 11 ستمبر کو جاری رہے گا، میچ وہیں سے شروع ہو گا جہاں پر روکا گیا تھا۔سری لنکا میں شدید بارشیں جاری ہے ، سری لنکا کے محکمہ موسمیات نے آئندہ چند دنوں میں مزید بارشوں کی پیشگوئی کی ہے جس کے باعث ٹورنامنٹ کا فائنل بھی متاثر ہونے کا خدشہ ہے۔پاکستان کرکٹ بورڈ نے ایشیا کپ کے دوران سری لنکا میں شدید بارشوں کے تناظر میں کئی متعدد اعتراضات اٹھائے تھے اور پی سی بی کی جانب سے بارشوں کے باعث ہونے والے نقصان کا ازالہ کرنے کا مطالبہ بھی کیا گیا ہے۔پاک بھارت میچ ریزرو ڈے پر جاتا ہے تو پھر بھارت کو بیک ٹو بیک میچ کھیلنا ہوں گے کیونکہ بھارت اور سری لنکا کا میچ 12 ستمبر کو شیڈول ہے۔ پاکستان اور بھارت کا میچ بارش کے باعث 11 ستمبر کو بھی نہیں ہوتا اور سری لنکا اور بھارت کا 12 ستمبر کو شیڈول میچ بھی بارش کے باعث واش آؤٹ ہو جاتا ہے تو اس صورت میں پاکستان براہ راست فائنل میں پہنچ جائے گا اور دوسری فائنلسٹ ٹیم کا چناؤ ٹاس پر ہو گا۔ایشیا کپ کا17ستمبر کو ہونے والا فائنل بھی بارش کے باعث متاثر ہونے کی صورت میں دونوں فائنلسٹ ٹیمیں مشترکہ فاتح قرار پائیں گی۔ دوسری جانب اس فیصلے پر بنگلہ دیش اور سری لنکن کی جانب سے اعتراض سامنے آیا،بنگلہ دیش ٹیم کے ہیڈ کوچ ہتھوڑا سینگھے نے کہا ہے کہ ایسا پہلی بار دیکھنے میں آیا ہے کہ ایک ٹورنامنٹ کے صرف ایک میچ کیلئے متبادل دن رکھا جائے۔یہ سب اس وقت کیا گیا جب ایشیا کپ کے آدھے سے زیادہ مقابلے مکمل ہوگئے،یہ فیصلہ میرے لئے حیران کن ہے۔سری لنکا کے کوچ کرس سلور ووڈ نے کہا کہ وہ اس فیصلے پر حیران ہیں۔انہوں نے کہا کہ جب میں نے پہلی بار سنا تو یہ قدرے حیرت کی بات ہے، ریزروڈے سے کسی ٹیم کو پوائنٹس ملے گا اور کوئی ٹیم متاثر ہوگی،انہوں نے کہا یہ یہ فیصلہ ایک نیا مسئلہ پیدا کرے گا۔
