برسلز میں ’’ہیریٹیج ڈے‘‘ کا انعقاد، پاکستانی ثقافت اجاگر کرنے کیلئے سفارتخانہ پاکستان کی جانب سے اسٹالز

برسلز( حافظ اُنیب راشد ) یورپین دارالحکومت برسلز میں ’’ ہیریٹیج ڈے‘‘ کے موقع پر سفارت خانہ پاکستان برسلز نے بھی بلجین شہریوں کو خوش آمدید کہا۔ اس موقع پر پاکستانی ثقافت کو اجاگر کرنے کیلئے سفارت خانے میں مختلف سٹال لگائے گئے تھے جہاں پاکستان کے چاروں صوبوں میں بننے والے دستکاری کے نمونے، پاکستان کے روایتی کھانے اور پاکستان سے یورپ آنے والی خشک خوراک اور دیگر مصنوعات شامل تھیں جب کہ کشمیری کھانوں کا اسٹال علیحدہ سے لگایا گیا تھا جہاں کشمیر کونسل کے چیئرمین علی رضا سید اور ان کی ٹیم نے زعفرانی چاول، لوبیا کا سالن، پلائو اور حلوے کے علاوہ کشمیری چائے سے مہمانوں کی تواضع کی جب کہ روایتی پکوڑے، سموسے اور چاٹ بھی مقامی لوگوں کی توجہ کا مرکز رہے۔ برسلز اربن ازم کے تحت منعقد ہونے والے اس ہیریٹیج ڈے کا وقت صبح 10سے شام 4بجے تک رکھا گیا تھا لیکن مقامی لوگوں کی آمد صبح سے ہی شروع ہوگئی تھی جہاں سفیر پاکستان آمنہ بلوچ سمیت سفارت خانے کے افسران نے انہیں خوش آمدید کہا۔ علاوہ ازیں اس موقع پر سماجی رہنما امین الحق اور ان کی ٹیم نے پاکستان کے روایتی لباسوں کے اسٹالز کی صورت میں پاکستان کا رنگ نمایاں کیا جب کہ ایک تصویری نمائش بھی لگائی گئی تھی جہاں پاکستان کے قدرتی حسن کو تصاویر کی صورت میں پیش کیا گیا ۔ سفیر پاکستان آمنہ بلوچ اور سفارت خانے کے دیگر افسران آنے والے مہمانوں کے درمیان گھل مل گئے اور ان کی جانب سے کئے جانے والے مختلف سوالوں کے جوابات دیئے۔ یورپین دارالحکومت برسلزمیں منعقد ہونے والا یہ ہیریٹیج ڈے پاکستان کے مثبت تشخص کو اجاگر کر نے کا ایک بہترین ذریعہ ثابت ہوا۔