کے الیکٹرک روز اول سےآج تک ایک بے لگام گھوڑا بنا ہوا ہے: شرجیل انعام میمن

 سندھ کے سینئر وزیر شرجیل انعام میمن نے کہا ہے کہ کے الیکٹرک روز اول سےآج تک ایک بے لگام گھوڑا بنا ہوا ہے۔

صوبائی وزیر شرجیل انعام میمن نے کے الیکٹرک پر اظہار برہمی کرتے ہوئے کہا کہ میٹر ریڈنگ کے بجائے محض اندازوں پر بل بھیجے جاتے ہیں، عوام بل لے کر جاتے ہیں تو کہا جاتا ہے بل کم نہیں قسطیں کر سکتے ہیں، بیلنس شیٹ نکالیں دیکھیں بجلی فراہمی کے ادارے کتنا منافع کما رہے ہیں۔

شرجیل میمن کا کہنا ہے بارش ہو یا گرمی، کے الیکٹرک کے فیڈر ٹرپ کر جاتے ہیں۔

انہوں نے مزید کہا کہ کے الیکٹرک، حیسکو، سیپکو آئین کی خلاف ورزی کر رہے ہیں، آئین کی خلاف ورزی پر قانون حرکت میں آئے گا۔

شرجیل انعام میمن نے کہا ہے کہ اسمبلی میں بل پاس ہونے پر کے الیکٹرک نے خط لکھا کہ حکومت کی طرف ہمارے واجبات ہیں، امتحانی مراکز کو بھی بجلی فراہم نہیں کی جا رہی۔