فرمان الہی
نماز کے اوقات
ترینمول کانگریس کے امیدوار سابق کرکٹر یوسف پٹھان نے مغربی بنگال کے حلقہ بہارم پور سے بڑی کامیابی حاصل کرلی۔ انہوں نے اپنے مقابلے میں کانگریس کے امیدوار ادھیر رنجن چوہدری کو بڑے مارجن سے شکست دے دی۔
بھارت میں لوک سبھا انتخابات کے نتائج آنے کا سلسلہ جاری ہے، جہاں اب تک مودی کے اتحادیوں کو برتری تو حاصل ہے تاہم اسکے 400 نشستیں لینے کا دعویٰ ہوا میں اُڑ گیا۔
یہی وجہ ہے کہ انڈین نیشنل کانگریس اور اس کے اتحادی بھی بڑی تعداد میں نشستیں جیت چکے ہیں یا ان پر آگے ہیں۔
ایسے میں بھارت کے الیکشن کمیشن کے مطابق ترینمول کانگریس (ٹی ایم سی) کے امیدوار اور سابق بھارتی کرکٹر یوسف پٹھان نے کامیابی حاصل کرلی۔
یوسف پٹھان نے کانگریس امیدوار کے 3 لاکھ 59 ہزار 367 کے مقابلے میں 4 لاکھ 23 ہزار 451 ووٹ حاصل کیے۔ اسی نشست پر بی جے پی کے امیدوار ڈاکٹر نرمل کمار ساہا تیسرے نمبر پر رہے جنہوں نے 3 لاکھ 23 ہزار 685 ووٹ حاصل کیے۔
میڈیا سے بات چیت کرتے ہوئے یوسف پٹھان کا کہنا تھا کہ ’میں ان سب کو مبارکباد دیتا ہوں جو میرے ساتھ رہے، یہ صرف میری جیت نہیں بلکہ تمام ورکرز کی جیت ہے۔ میں اپنی جیت پر انتہائی خوش ہوں۔‘
انہوں نے مزید کہا کہ ریکارڈ بنتے ہی ٹوٹنے کےلیے ہیں، میں ادھیر رنجن کی عزت کرتا ہوں اور کرتا رہوں گا۔
یوسف پٹھان نے رکن پارلیمنٹ منتخب ہوکر اپنے کاموں کی فہرست بتاتے ہوئے کہا کہ میں سب سے پہلے اپنے حلقے میں ایک اسپورٹس اکیڈمی بناؤں گا تاکہ یہاں موجود نوجوان اپنا کیریئر بناسکیں۔
انکا کہنا تھا کہ میں صنعتوں کےلیے کام کروں گا، میں یہاں رہوں گا اور لوگوں کےلیے کام کروں گا۔
انہوں نے کہا کہ میں گجرات میں اپنے خاندان والوں کے ساتھ بھی ہوں گا، لیکن اب مجھے بیہرم پور میں ایک اور خاندان مل گیا ہے۔ میں نے اپنی کامیابی کے بعد ممتا بنرجی سے بات کی ہے، وہ سب بہت خوش ہیں۔
