میڈیا نے ہمیشہ پاکستان کا متنازع اور بدنام چہرہ دکھایا ہے، جوزف بلانچ

بارسلونا (جواد چیمہ)سپینش سیاح فوٹوگرافر جوزف بلانچ کے دورہ پاکستان کے حوالے سے بارسلونا داراسانس سنٹر میں تصویری نمائش منعقد کی گئی۔نمائش میں پاکستانی اور سپینش افراد نے شرکت کی۔ جوزف بلانچ نے پاکستانی ثقافت کا بہترین انداز اور الفاظ میں تذکرہ کیا۔ جوزف بلانچ نے کہا کہ افغانستان پر غور کئے بغیر ہم پاکستان کے ثقافتی ڈھانچے کو سمجھ نہیں سکتے،پاکستان ایک ایسا ملک ہے جو برطانوی نوآبادیاتی حدود کی نشان دہی کرتا ہے، میڈیا نے ہمیشہ پاکستان کوایک تنازع والے ملک کے طور پر پیش کیا ہے اور بدنام چہرہ دکھایا ہے لیکن وہاں جنونیت اور دہشت گردی نہیں ہے، بدقسمتی سے اس جغرافیائی اورسیاسی صورتحال میں پاکستان ایک ایسا ملک ہے جس میں بہت سے پُرکشش مقامات ہیں جن میں دنیا کے چند بلند ترین اور سب سے شاندار پہاڑ، بہت سی مختلف یادگاریں اور عمارتیں ہیں جن میں سے بہت سی یونیسکو کی طرف سے تاریخی ورثہ ہے، اس کے علاوہ پاکستان ثقافتی اور سماجی دولت سے بھرا ہوا ہے لیکن پاکستان میں سب سے اہم چیز عوام ہیں۔ روایت پسندی کا مظاہرہ کرنے والے پاکستانی دوستانہ اور مہمان نواز ہیں اور وہ حقیقی جوش اور دلچسپی کے ساتھ مہمانوں کا استقبال کرتے ہیں۔ وہ لوگ جو دنیا میں گھومتے ہیں اور نئی جگہیں تلاش کرنے میں وقت گزارتے ہیں،ان کے لئے میں نے سوچا کہ تصاویر کے ذریعے پاکستان دکھاؤں اور میں یہ تجویز دوں گا کہ اگر آپ لوگ سیر کے لئے کہیں جانا چاہتے ہیں تو پاکستان کو ترجیح دیں۔