فرمان الہی
نماز کے اوقات
لندن (پی اے) فارمیسی کے رہنماؤں نے لوگوں پر زور دیا ہے کہ وہ وزن کم کرنے کے جعلی جابس آن لائن نہ خریدیں۔ ان کا کہنا ہے کہ اوزیمپک کی قلت اگلے سال تک بڑھنے کی امید ہے۔ نیشنل فارمیسی ایسوسی ایشن (این پی اے) نے خبردار کیا کہ دواؤں کی بغیر لائسنس کے آن لائن فروخت میں ہونے والے دھماکے سے لوگ اوزیمپک اور ویگووی (سیمگلوٹائڈ) کو مناسب جانچ کے بغیر خرید کر اپنی صحت کو خطرے میں ڈال سکتے ہیں۔ وزن کم کرنے کے انجیکشن بہت مقبول ہو چکے ہیں، سوشل میڈیا پر چربی کم ہونےسے پہلے اور بعد کی تصاویر دکھائی جاتی ہیں اور کچھ مشہور شخصیات ان کے استعمال کی توثیق کر رہی ہیں۔ اوزیمپک ٹائپ 2ذیابیطس والے لوگوں کے لئے این ایچ ایس پر دستیاب ہے جبکہ ویگووے کو وزن میں کمی کے لئے ماہر وزن کے انتظام کی خدمات کے ذریعے تجویز کیا جا سکتا ہے۔ فارماسسٹ اوزیمپک کی کمی کا سامنا کر رہے ہیں، جس کی زیادہ مانگ ہے اور حقیقت یہ ہے کہ کچھ طبیب اسے موٹے لوگوں کے لئے آف لیبل تجویز کر رہے ہیں۔ اوزیمپک، نووو نارڈ ڈسک کی طرف سے بنائی گئی ہے جو کہ ٹائپ 2ذیابیطس والے لوگوں کے خون میں شکر کی سطح کو کنٹرول کرنے میں مدد کرتی ہے لیکن اس کی بھوک کو دبانے کی صلاحیت بھی لوگوں کو وزن کم کرنے کے لئے اس کا استعمال کرنے پر مجبور کرتی ہے۔ اس کی وجہ سے ذیابیطس کے مریضوں کے لئے دوائیوں کی قلت پیدا ہو گئی ہے جبکہ جعلی جیبس میں بھی اضافہ ہوا ہے۔ این پی اے، جو 5000سے زیادہ آزادانہ طور پر چلنے والی کمیونٹی فارمیسیوں کی نمائندگی کرتی ہے، مریضوں پر زور دے رہی ہے کہ دوائیں آن لائن نہ خریدیں جو برطانیہ میں رجسٹرڈ اور ریگولیٹ نہیں ہیں، اس کی بجائےوہ اپنے فارماسسٹ یا جی پی سے بات کریں۔ اس نے یہ بھی خبردار کیا کہ اوزیمپک حاصل کرنے میں مسائل اگلے سال تک جاری رہنے کا امکان ہے۔ این پی اے کے چیئرمین نک کائے نے پی اے نیوز ایجنسی کو بتایا کہ فارماسسٹ اس بات پر گہری تشویش میں مبتلا ہیں کہ ادویات کی قلت کا موجودہ بحران آن لائن ادویات کی بغیر لائسنس کے فروخت میں دھماکے کا باعث بن سکتا ہے۔ برطانیہ میں کمیونٹی فارمیسی میں اوزیمپک کے ذخیرے بہت کم ہیں اور یہ ضروری ہے کہ یہ ان لوگوں کے لئے ترجیحات میں رہیں، جنہیں انتہائی طبی ضرورت ہے۔ دیگر اہم دوائیوں کی سپلائی کی غیر یقینی حالت کے پیش نظر نامناسب آن لائن دکانداروں سے سپلائی کا آرڈر دینے والے لوگوں کا بہت زیادہ خطرہ ہے۔ ویگووی اسٹاک اس وقت زیادہ خراب نہیں ہیں، یہ اوزیمپک ہے جو پریشانی کا باعث ہے۔ ہمیں بتایا گیا ہے کہ وہ اسٹاک 0.25 (mg)، 0.5mg یا 1mg کی خوراک میں 27 دسمبر تک واپس نہیں آئیں گے۔ یہ خود مینوفیکچررز کی طرف سے موجودہ متوقع تاریخ ہے۔ ہمارے تمام تجربے میں اس تاریخ سے پہلے دستیاب ہونے کا امکان بہت کم ہے۔ ضرورت پڑنے پر لوگ اکثر اوزیمپک کو 0.25mg کی سب سے کم خوراک پر شروع کرتے ہیں۔ جنوری میں محکمہ صحت اور سماجی نگہداشت نے صحت کی دیکھ بھال فراہم کرنے والوں سے کہا کہ وہ وزن میں کمی کے لئے دوائیں آف لیبل نہ لکھیں اور کہا کہ موجودہ اسٹاک کو ٹائپ 2 ذیابیطس کے مریضوں کے لئے محفوظ رکھنا چاہئے۔ اس میں کہا گیا ہے کہ لائسنس یافتہ اور آف لیبل اشارے کے لئے ان مصنوعات کی مانگ میں اضافے کی وجہ سے سپلائی کے مسائل پیدا ہوئے ہیں اور کم از کم 2024 کے آخر تک سپلائی کے معمول پر آنے کی توقع نہیں ہے۔
