کوئی شک نہیں کہ عمر قید جنرل فیض نے دلوائی، حنیف عباسی

پاکستان مسلم لیگ (ن) کے رہنما حنیف عباسی نے  کہا کہ کوئی شک نہیں کہ عمر قید جنرل فیض نے دلوائی، میرے بیٹے کو کہا گیا کہ سزا کے خلاف اپیل دائر نہیں کرنا۔

جیو نیوز کے پروگرام کیپٹل ٹاک میں گفتگو کرتے ہوئے حنیف عباسی نے کہا کہ اٹک جیل میں لوگ آئے اور کہا کہ پارٹی آپ چھوڑتے ہیں تو باہر آجائیں گے۔

حنیف عباسی نے کہا کہ فیض حمید کے کاروباری لوگوں سے بہت رابطے تھے، ایک کاروباری شخصیت میرے پاس آئی اور کہا کہ الیکشن لڑنا ضروری ہے؟ نہ لڑیں تو بہتر ہے، ایک کاروباری شخص نے ملاقات میں کہا کہ اگر میں الیکشن لڑو گا تو سزائے موت ہوگی یا عمر قید۔

انہوں نے کہا کہ جب پریس کانفرنس کی تو فیصلہ نہیں پڑھا، کسی کو قانون اپنے ہاتھ میں لینے کی اجازت نہیں، بہت سارے لوگوں کو آئین کو ری رائٹ کرنے کا شوق ہوگیا۔

رہنما مسلم لیگ ن نے پیپلز پارٹی (پی پی پی) کے چیئرمین  بلاول بھٹو زرداری کی جانب سے وزیراعظم شہباز شریف کو اچھے اسپتال بنانے کا طریقہ بتانے کی پیشکش کا جواب بھی دے دیا۔

 انہوں نے کہا کہ بلاول بھٹو زرداری پنجاب کے اسپتالوں کا دورہ کریں اور میں سندھ کے اسپتالوں کا دورہ کروں گا، صحت کے شعبوں میں صوبوں میں مقابلہ رہنا چاہیے۔

 حنیف عباسی نے کہا کہ اسپتالوں میں بہتری کی جدوجہد ایک مثبت مقابلہ ہے اور اسے جاری رہنا چاہیے، بلاول کے ساتھ کراچی کا دورہ کرنا چاہتا ہوں،  انہیں راولپنڈی کے اسپتالوں کا بھی دورہ کروانا چاہتا ہوں۔