فرمان الہی
نماز کے اوقات
عالمی شہرت یافتہ پاکستانی گلوکار عاطف اسلم نے انکشاف کیا ہے کہ اُنہوں نے پچھلے کئی سال سے میوزک نہیں سنا۔
عاطف اسلم نے اپنے وی لاگ ’مائے بارڈر لیس ورلڈ‘میں اپنے میوزک کیریئر کے بارے میں بات کرتے ہوئے بتایا کہ مجھے میوزک کے ساتھ اپنے لگاؤ کا احساس اس وقت ہوا جب میرے والدین نئے گھر میں شفٹ ہوئے اور پرانا والا گھر خالی کر دیا تو میں نے پرانے گھر کے اوپر والے حصّے میں جا کر گانا شروع کر دیا۔
اُنہوں نے بتایا کہ گاتے ہوئے جب میری آواز اونچی ہوئی تو میں ڈر گیا اور سوچنے لگا کہ یہ ابھی کیا ہوا تھا؟ پھر جلدی سے دروازے بند کر کے نیچے آ گیا۔
گلوکار نے بتایا کہ وقتی طور پر تو میں ڈر گیا تھا لیکن اس واقعے کے بعد میں نے سوچا کہ مجھے یہ جاننے کی کوشش کرنی چاہیے کہ جب میں خالی کمرے میں گانا گا رہا تھا تو اس وقت کیا ہوا تھا؟ اس لیے میں نے دوبارہ اسی خالی کمرے جا کر گانا گایا اور میں پھر ڈر کر واپس آ گیا اور یہ سلسلہ جاری رہا۔
اُنہوں نے بتایا کہ دراصل اس وقت میں صرف 14 سال کا تھا اور میوزک کے تکنیکی پہلوؤں سے واقف نہیں تھا، مگر پھر آہستہ آہستہ میری ایسے لوگوں سے ملاقات ہوئی جنہیں میوزک کی سمجھ تھی اور اُنہوں نے مجھے بتایا کہ گانے کیسے بنائے جاتے ہیں، گانوں کے بول کس طرح لکھے جاتے ہیں، میوزک ویڈیوز کیسے بنتی ہیں اور اس طرح میرے میوزک کیریئر کا آغاز ہوا۔
عاطف اسلم نے میوزک کی اپنی زندگی میں اہمیت کے بارے میں بات کرتے ہوئے کہا کہ مجھے نہیں لگتا کہ میں میوزک کے بغیر زندہ رہ سکتا ہوں، زندگی بالکل پھیکی سی ہو جائے گی اگر میوزک نہیں ہو گا۔
اُنہوں نے بتایا کہ ایک بڑی دلچسپ بات یہ ہے کہ میں نے پچھلے کافی عرصے سے میوزک سنا نہیں ہے لیکن ابھی دوبارہ میوزک سننا شروع کیا ہے اور میں اس سے بہت لطف اندوز ہو رہا ہوں۔
گلوکار نے میوزک نہ سننے کی وجہ بتاتے ہوئے کہا کہ میں پچھلے کئی سال میں کام کی وجہ سے بہت زیادہ مصروف رہا تو مجھے میوزک سننے کا وقت نہیں ملتا تھا۔
اُنہوں نے اتنی کامیابی حاصل کرنے کے بعد مستقبل کے لیے اپنے ارادوں کے بارے میں بات کرتے ہوئے کہا کہ میرے پسندیدہ اداکار ڈینزیل واشنگٹن کا قول ہے کہ انسان اپنی زندگی میں سب سے پہلے سیکھتا ہے، پھر اس سے پیسے کماتا ہے اور پھر جو کچھ اس نے حاصل کیا ہو اسے معاشرے کی فلاح و بہبود کے لیے استعمال کرتا ہے، تو اب میرا خیال ہے کہ وہ وقت آ گیا کہ میں اپنے معاشرے اور نئے آنے والے گلوکاروں کے لیے کچھ کروں۔
عاطف اسلم نے کہا کہ میں اب نئے آنے والے گلوکاروں، موسیقاروں اور ویڈیو گرافرز کو سامنے آنے کا موقع دینا چاہتا ہوں۔
اُنہوں نے حال ہی میں ’بارڈر لیس ورلڈ‘ کے نام سے اُٹھائے گئے اپنے اقدام کے بارے میں بتایا کہ میں نے یہ اقدام اسی سوچ کے ساتھ اُٹھایا ہے کہ مختلف شعبوں سے باصلاحیت افراد کو سامنے آنے کا موقع دیا جائے چاہے وہ موسیقار ہوں، گیت نگار ہوں، ویڈیو گرافرز ہوں، ہدایت کار ہوں یا پھر اداکار ہوں۔
گلوکار نے بتایا کہ’بارڈر لیس ورلڈ‘ پروگرام میں کسی قسم کا کوئی مقابلہ نہیں ہو گا بلکہ نئے باصلاحیت لوگوں کے ساتھ مل کر کام کیا جائے گا۔
اُنہوں نے اپنی بات مکمل کرتے ہوئے کہا کہ مجھے امید ہے کہ میرا یہ اقدام نئے آنے والے لوگوں کو اپنے شوق کو آگے بڑھانے کی ترغیب دے گا۔
