• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گندم کی منڈی میں قانون و ضوابط کے خاتمے کیلئے کوششیں تیز، آئی ایم ایف کے توسیعی سہولت پروگرام کی ایک بڑی شرط یہی ہے، اقدام اقتصادی اصلاحات کا حصہ

آج کا اخبار
اہم خبریں
25 جنوری ، 2025
اسلام آباد(اسرار خان ) پاکستان نے گندم کی منڈی میں قواعد و ضوابط کے خاتمے ( ڈی ریگولیشن ) کے لیے کوششیں تیز کر دی ہیں تاکہ انٹرنیشنل مانیٹری فنڈ (آئی ایم ایف) کے 37ماہ کے ایکسٹینڈڈ فنڈ فیسیلیٹی کی ایک بڑی شرط کو پورا کیا جا سکے۔ یہ شرط موجودہ مالی سال سے زرعی اشیاء اور ان پٹ مارکیٹوں کی ڈی ریگولیشن کا تقاضا کرتی ہے۔آئی ایم ایف کے 37 ماہ کے ایکسٹینڈڈ فنڈ فیسیلیٹی کے لیے جاری میمورنڈم آف اکنامک اینڈ فنانشل پالیسیز کے مطابق، پاکستان نے مالی سال 2025-26 سے زرعی اشیاء اور ان پٹ مارکیٹوں کی مکمل ڈی ریگولیشن پر اتفاق کیا ہے۔ یہ اقدام وسیع تر اقتصادی اصلاحات کا حصہ ہے، جس کا مقصد مارکیٹ کی کارکردگی کو بہتر بنانا اور آئی ایم ایف کے ساختی معیار پر پورا اترنا ہے۔گندم کا شعبہ — جو ملک کی غذائی تحفظ کا مرکز اور ریاستی مداخلت کی ایک علامت ہے — ان اصلاحات کے لیے ایک کسوٹی کا کردار ادا کرے گا۔ان اصلاحات کے لیے ایک روڈ میپ تیار کرنے کے مقصد سے، وزارتِ قومی غذائی تحفظ و تحقیق (MNFSR) نے ایشیائی ترقیاتی بینک (ADB) کی مدد سے جمعہ کے روز ایک اعلیٰ سطحی ورکشاپ کا انعقاد کیا۔صوبائی حکام، نجی شعبے کے نمائندے، اور بین الاقوامی ترقیاتی شراکت دار گندم کے شعبے کو بہتر بنانے کے لیے حکمت عملیوں کا جائزہ لینے کے لیے جمع ہوئے۔حکومت نے گندم کی نقل و حرکت پر کسی قسم کی پابندی کے بغیر گندم مارکیٹ کی ڈی ریگولیشن کے نفاذ کے عزم کا اعادہ کیا۔ صنعت کے نمائندوں نے جدید اسٹوریج کی سہولیات اور سپلائی چین کی بہتری میں سرمایہ کاری کا وعدہ کیا۔ ڈیجیٹل ٹریڈنگ پلیٹ فارمز اور پریسیژن ایگریکلچر کو ترقی کے کلیدی شعبے کے طور پر نمایاں کیا گیا، جبکہ شرکاء نے غذائی تحفظ اور اقتصادی پائیداری کو یقینی بنانے کے لیے اسٹریٹجک شراکت داری کی اہمیت پر زور دیا۔ورکشاپ کا آغاز سیکرٹری MNFSR، جناب وسیم اجمل چودھری کے افتتاحی کلمات سے ہوا، جنہوں نے گندم مارکیٹ اصلاحات کے لیے ایک مشترکہ، کثیر شراکت دارانہ نقطہ نظر کی اہمیت پر زور دیا۔ تمام صوبوں کی شرکت کو یقینی بنا کر وزارت کا مقصد پاکستان بھر میں زمینی حقائق کی عکاسی کرنے والی پالیسیاں تشکیل دینا تھا۔
اہم خبریں سے مزید