فرمان الہی
نماز کے اوقات
اسلام آ باد ( رانا غلام قادر) وزیر اعظم کی تشکیل کردہ ٹاسک فورس نے رئیل اسٹیٹ اور ہائوسنگ کے شعبے کی ترقی اور فروغ کے لیے مراعات کا جامع پیکیج تیار کرلیا۔
ٹاسک فورس نے سفارش کی ہے کہ وفاقی حکو مت کے ساتھ ساتھ صوبائی حکومتیں بھی پیکج پر عمل درآ مد کریں۔ یہ سفارشات منظوری کیلئے وزیر اعظم کو پیش کردی گئی ہیں۔
وزیراعظم شہباز شریف نے سفارشات پر غور کے لیے 3 فروری کو اجلاس طلب کرلیا۔ پریزنٹیشن لینےکے بعد وزیر اعظم حتمی فیصلہ کی منظوری دیں گے۔
ٹاسک فورس نے پراپرٹی اور ہاسنگ سیکٹر میں گزشتہ بجٹ کے دوران لگائے گئے ٹیکسز پر نظر ثانی کی تجویز دیدی۔
ذرائع کے مطابق وزارت ہاسنگ کی 11 رکنی ٹاسک فورس نے 40سے زائد اہم سفارشات و تجاویز مرتب کرلی ہیں جس کے تحت رئیل اسٹیٹ اور ہاسنگ کے شعبے میں عوام کو مراعات دینے کا پیکیج تیار کیا گیا۔
یہ ٹاسک فورس وفاقی وزیر ہائوسنگ وتعمیرات ریاض حسین پیر زداہ کی سربراہی میں قائم کی گئی تھی۔ اس سلسلے میں 11رکنی ٹاسک فورس کی سفارشات وزیراعظم شہباز شریف کو پیش کردی گئی ہیں۔
وزیراعظم کو رہائشی گھروں کے لیے دو کی بجائے تین منزلیں تعمیر کرنے کی اجازت دینے کی سفارش کی گئی۔
اسی طرح پہلی مرتبہ گھر خریدنے پر ٹیکس کی مکمل چھوٹ دینے کی سفارش بھی شامل ہے جب کہ پراپرٹی کی خرید و فروخت پر عائد وفاقی اور صوبائی ٹیکسز پر نظر ثانی کرنے کی تجویز بھی دی گئی۔
علاوہ ازیں پراپرٹی فروخت کرنے پر ٹیکس 4 سے کم کرکے 2فیصد مقرر کرنے، خریدار پر ٹیکس 4 فیصد سے کم کرکے اعشاریہ 5فیصد مقرر کرنے، پراپرٹی کی خرید وفروخت پرفیڈرل ایکسائز ڈیوٹی ختم کرنے اور ہاسنگ کے لیے کم آمدن افراد کو ہاسنگ سبسڈی دینے کی سفارش کی گئی ہے۔
