فرمان الہی
نماز کے اوقات
پاکستان اسٹیج ڈراموں کی معروف سابقہ اداکارہ و رقاصہ نرگس نے انکشاف کیا ہے کہ ان کے دین کی جانب آنے میں اہم کردار معروف اسلامک اسکالر مولانا طارق جمیل کا ہے۔
غزالہ ادریس المعروف نرگس نے حال ہی میں ایک نجی یوٹیوب چینل کو انٹرویو دیا ہے۔
نرگس نے اس دوران انکشاف کیا کہ میں کئی عمرے اور 4 حج ادا کر چکی ہوں، اللّٰہ تعالیٰ نے اگر اس سال موقع دیا تو اس سال میرا یہ پانچواں حج ہو گا، میں ہر سال کسی نہ کسی کی حج پر جانے کے لیے مدد بھی کرتی ہوں۔
دین کی خاطر شوبز کو خیرباد کہنے والی نرگس کا کہنا ہے کہ میں 7 وقت کی پابندی سے نماز ادا کرتی ہوں، ایک وقت تھا میں گانے سنے بغیر میک اپ نہیں کرواتی تھی اور اب میں بغیر الارم کے تہجد کے لیے اٹھ جاتی ہوں، میں تہجد اور اشراق کے علاوہ 5 فرض نمازوں کی باقاعدگی سے پابندی کرتی ہوں۔
شوبز کی دنیا چھوڑ کر دین کی جانب راغب ہونے کے سوال پر نرگس نے بتایا کہ مجھے مذہب کی جانب لانے والے مولانا طارق جمیل ہیں، میں نے پہلا حج انہی کے ساتھ ادا کیا تھا۔
انہوں نے بتایا کہ مولانا طارق جمیل نے مجھے حج پر جانے کے لیے کہا، میں نے انہیں بتایا کہ میں نے 3 کروڑ روپے بطور معاضہ لیے ہوئے ہیں، میں کیسے حج پر چلی جاؤں؟ مجھے پھر آ کر عبایا اتارنا پڑے گا اور کام کرنا ہو گا۔
نرگس کے مطابق اس پر مولانا طارق جمیل نے کہا کہ وہ 3 کروڑ روپے تمہیں ہم دیتے ہیں مگر پہلے اس بات کا فیصلہ کر لو کہ ایک بار اس راہ پر چل پڑیں تو کبھی پچھتاوا یا دوبارہ انڈسٹری میں کام کرنے کا دل تو نہیں کرے گا؟
سابقہ اداکارہ کا کہنا ہے کہ مولانا طارق جمیل نے مجھے کہا کہ پہلے دل سے تسلی کر لو، اس وقت بدلنا جب اندر سے بدل جاؤ۔
نرگس نے کہا کہ مولانا طارق جمیل نے مجھے تبلیغ میں بھی آنے کی دعوت دی، انہوں نے مجھے کہا کہ یہ جہاد ہے اس میں شامل ہو جاؤ اور دوسرے افراد کو بھی اس راہ پر لانے کی کوشش کرو۔
