فرمان الہی
نماز کے اوقات
سینئر پروفیسر ڈاکٹر ایم رضا شاہ کو بین الاقوامی مرکز برائے کیمیائی و حیاتیاتی علوم (آئی سی سی بی ایس) کا مستقل ڈائریکٹر مقرر کر کے نوٹی فکیشن جاری کر دیا گیا ہے۔
گزشتہ برس 15 اکتوبر کو وائس چانسلر جامعہ کراچی ڈاکٹر خالد محمود عراقی کی زیرِ صدارت ہونے والے اجلاس میں 8 امیدواروں کے انٹرویوز ہوئے تھے۔
انٹرویو میں 2 امیدوار پروفیسر فرزانہ شاہین اور پروفیسر شبانہ سمجی نے سلیکشن بورڈ میں اپنے وکیل کا لیگل نوٹس دیا۔
ان دونوں کا کہنا تھا کہ یہ سلیکشن بورڈ قانونی نہیں ہے اور وہ دونوں خواتین امیدوار انٹرویو دیے بغیر چلی گئی تھیں، تاہم سلیکشن بورڈ نے اپنی کارروائی جاری رکھی اور 3 امیدواروں کے ناموں کا انتخاب کر لیا۔
سلیکشن بورڈ میں جن اراکین نے شرکت کی ان میں شعیب صدیقی، ڈین سائنسز ڈاکٹر مسرت جہاں یوسف، نادرہ پنجوانی، عزیز جمال، ڈاکٹر محمد اشرف، ڈاکٹر شاہد پرویز شامل تھے۔
یاد رہے کہ ایچ ای جے اور انٹرنیشنل سینٹر فار کیمیکل اینڈ بیالوجیکل سائنسز ( آئی سی سی بی ایس) میں 66 برس بعد سلیکشن بورڈ کا انعقاد ہوا تھا۔
ان برسوں میں صرف 3 امیدوار ہی مستقل ڈائریکٹر تعینات رہے جن میں ڈاکٹر سلیم الزماں صدیقی، ڈاکٹر عطاء الرحمٰن اور ڈاکٹر اقبال چوہدری شامل ہیں۔
جامعہ کراچی کے صوبائی اسمبلی سے منظور شدہ ایکٹ کے مطابق ڈائریکٹر اور چیئرمین کی مدت 3 برس کے لیے ہوتی ہے تاہم جامعہ کراچی نے ایکٹ کو نظر انداز کر کے بعض ڈائریکٹرز کی مدت 4 برس مقرر کر رکھی ہے۔
