فرمان الہی
نماز کے اوقات
کراچی(اسٹاف رپورٹر) ثانوی تعلیمی بورڈ کے تحت نہم و دہم جماعت سائنس و جنرل گروپ ریگولر اور پرائیویٹ کے سالانہ امتحانات کے پہلے دن صبح کی شفٹ میں ساڑھے 9:30سے 12:30بجے تک سیکنڈری اسکول سرٹیفکیٹ جماعت دہم کیلئے سائنس گروپ کمپیوٹر اسٹیڈیز کا پرچہ(دوم) جبکہ شام کو 2:30بجے سے 5:30 تک جنرل گروپ ریگولر و پرائیویٹ دہم جماعت جنرل سائنس کاپرچہ (دوم) ہوا، ان دونوں شفٹوں میں تمام پرچے وقت مقررہ پر شروع کئے گئے اور شیڈول کے مطابق وقت ہی پرختم ہوئے، اس دوران بورڈکے افسران نے بورڈ کی جانب سے بنائے گئے مرکز پر امتحانی پرچے پہنچا کر اسکولوں کے سینٹر سپرنٹنڈنٹ اور ان کے نمائندوں کے حوالے کر کے امتحانی پرچے وقت مقررہ پر شروع کرائے ،بورڈ کے چیئرمین، ناظم امتحانات اور دیگر افسران نے صحافیوں کے ہمراہ کمپری ہینسو گورنمنٹ گرلز ہائی اسکول بلاک Mنارتھ ناظم آباد اور چلڈرنز ایجوکیشنل سینٹر گورنمنٹ بوائز سیکنڈری اسکول نارتھ ناظم آباد کے امتحانی مراکز کا دورہ کیا، اس موقع پر امتحانی مراکز کی نگرانی کرنے والے عملے، سینٹر سپرنٹنڈنٹس اور دیگرافسران سے بات چیت کرتے ہوئے چیئرمین بورڈ نے کہا کہ شفاف امتحانات کیلئے ہمیں تمام اداروں کا تعاون حاصل ہے نقل کی روک تھام کیلئے اپنی تمام تر صلاحیتیں بروئے کار لائیں،نقل کرنے اور کرانے والوں کے ساتھ سختی سے نمٹا جائے گا، انہوں نے اس موقع پر سینٹر سپرنٹنڈنٹ کو خصوصی ہدایت دی کہ وہ امتحانات کے دوران شدید گرمی ہونے کے باعث طلباء و طالبات کیلئے ٹھنڈے پانی کا بندوبست ضرور کریں۔ چیئرمین بورڈ نے ایک بار پھر کے الیکٹرک کو کہا کہ وہ امتحانات کے دوران لوڈشیڈنگ نہ کرے۔
