فرمان الہی
نماز کے اوقات
اداکار سمیع خان شوبز انڈسٹری میں طلاقوں کے بڑھتے رجحان پر بول اٹھے۔
نامور اداکار سمیع خان جو گزشتہ 2 دہائیوں سے شوبز انڈسٹری کا حصہ ہیں، ان دنوں کئی ڈرامہ سیریلز میں اپنی بہترین اداکاری کے جوہر دکھا رہے ہیں۔
حال ہی میں انہوں نے ایک شو میں بطور مہمان شرکت کی جہاں انہوں نے اپنے کیریئر اور ذاتی زندگی کے بارے میں کھل کر گفتگو کی، سمیع خان خوش گوار ازدواجی زندگی گزار رہے ہیں اور 2 خوبصورت بچوں کے والد ہیں۔
گفتگو کے دوران اداکار نے کامیاب شادی کے راز بتاتے ہوئے کہا کہ شادی تب ہی کامیاب ہوتی ہے جب ایک دوسرے سے غیر حقیقی توقعات نہ رکھی جائیں، حقیقت پسند بن کر جینا اور ایک دوسرے کو سمجھنا ضروری ہے، تھوڑی بہت قربانی دینا پڑتی ہے، اگر آپ چاہتے ہیں کہ آپ کی بات مانی جائے تو آپ کو بھی اپنے شریکِ حیات کی بات کو تسلیم کرنا ہو گا۔
سمیع خان نے معاشرے میں بڑھتی ہوئی طلاقوں پر بات کرتے ہوئے کہا کہ آج کل لوگ ایک دوسرے سے بہت زیادہ توقعات رکھنے لگے ہیں، ہر کوئی چاہتا ہے کہ دوسرا اس کی ہر خواہش پوری کرے، جو کہ ممکن نہیں۔
انہوں نے کہا کہ شادی میں کچھ بنیادی حدود بھی ہوتی ہیں اگر کسی شادی میں گھریلو تشدد ہو یا رشتہ زہریلا ہو جائے تو وہاں سے نکل جانا ہی بہتر ہے، ایسی صورتِ حال میں صبر یا برداشت کرنا مناسب نہیں۔
شوبز انڈسٹری میں ہونے والی طلاقوں پر اظہارِ افسوس کرتے ہوئے سمیع خان نے کہا کہ جب بھی کسی انڈسٹری سے تعلق رکھنے والے جوڑے کی طلاق ہوتی ہے تو مجھے ذاتی طور پر دکھ ہوتا ہے کیونکہ میں ان لوگوں کو جانتا ہوں، ایسا لگتا ہے کہ شاید تھوڑی اور کوشش کی جاتی تو رشتہ بچ سکتا تھا، لیکن یہ بھی حقیقت ہے کہ آج کل طلاقیں صرف انڈسٹری میں نہیں بلکہ پورے معاشرے میں بڑھ گئی ہیں۔
