• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ٹریفک قوانین کی خلاف ورزی پر 17,980 موٹر سائیکلیں ضبط

آج کا اخبار
اہم خبریں
21 اپریل ، 2025
کراچی (اسٹاف رپورٹر)سندھ حکومت کی جانب سے ٹریفک قوانین کے خلاف جاری کریک ڈاؤن میں اب تک مجموعی طور پر 17,980موٹر سائیکلیں ضبط کی جا چکی ہیں۔ سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ کریک ڈاؤن شہریوں کی جان و مال کے تحفظ کیلئے کیے گئے۔ انہوں نے بتایا کہ فینسی نمبر پلیٹس، ٹنٹڈ گلاس اور دیگر غیر قانونی لوازمات کے خلاف 1,295کارروائیاں عمل میں لائی گئیں ہیں، 308ہیوی اور لائٹ ٹرانسپورٹ گاڑیاں ضبط کی گئیں 230گاڑیوں کی رجسٹریشن کو عارضی طور پر معطل کرتے ہوئے مخصوص شرائط کے تحت چھوڑا گیا، شرائط میں تکنیکی بہتری، فٹنس سرٹیفکیٹ کی تجدید، اور دیگر عوامل شامل ہیں۔ ایک بیان میں سینئر وزیر نے کہا کہ ٹریفک قوانین کی خلاف ورزی صرف ایک معمولی جرم نہیں بلکہ اجتماعی سلامتی کیلئے خطرہ ہے، کارروائیاں بلا تفریق جاری رہیں گی، قانون کی خلاف ورزی کسی صورت برداشت نہیں کی جائیگی۔ شرجیل انعام میمن نے کہا کہ یہ مہم صرف آغاز ہے، اور آنے والے دنوں میں مزید سخت اقدامات کیے جائینگے، شہری قانون نافذ کرنے والے اداروں سے مکمل تعاون کریں اور غیر قانونی لوازمات سے گریز کریں ۔
اہم خبریں سے مزید