• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

تاریخی مقامات، سٹیڈیم ،اوقاف دفاتر کی اپ گریڈیشن شروع کردی،کمشنر

میرا شہر
ملتان
03 مئی ، 2025
ملتان (سٹاف رپورٹر)کمشنر ملتان ڈویژن عامر کریم خاں نے کہا ہے کہ وزیر اعلیٰ پنجاب مریم نواز شریف نے شہر اولیاءکی تاریخی حیثیت کی بحالی کیلئے میگا پراجیکٹ دیا ہے اس سلسلے میں والڈ سٹی اتھارٹی کے تحت قلعہ کہنہ،دمدمہ ،قاسم پارک،سٹیڈیم اور اوقاف دفاتر کی اپ گریڈیشن شروع کردی گئی ہے ،یہ بات انہوں نے گزشتہ روز والد سٹی اتھارٹی اور ضلعی حکام کے اجلاس کی صدارت کرتے ہوئے کی۔ڈپٹی کمشنر،ڈی جی ایم ڈی اے سمیت ضلعی حکام بھی اجلاس میںشریک ہوئے،کمشنر نے خطاب کرتے ہوئےمزید کہا کہ2ارب78کر وڑ سے زائد کی لاگت سے قلعہ کہنہ اور درباروں کی مکمل تاریخی حیثیت کو اجاگر کیا جائے گا جبکہ سٹیڈیم کے گرد جدید فوڈ کورٹ اور لینڈ سکیپننگ کے ذریعے خوبصورتی بحال کی جائے گی۔کمشنر نے مزید کہا کہ انڈر گراؤنڈ پاور سسٹم پر کام شروع کردیا گیا ہے جبکہ تاریخی پانی کی ٹینکی کو بھی تفریحی پوائنٹ میں تبدیل کیا جائے گا۔عامر کریم خاں نے کہا کہ اوقاف دفاتر اور زائرین کیلئے خصوصی جگہ مختص کرکے خوبصورتی میں اضافہ کیا جائے گا اسی طرح نگار خانہ اور تاریخی لائیبریری کو بھی مکمل اپ گریڈ کرنے اور دمدمہ بلڈنگ پر ٹاپ روف کیفے کو بھی پلان میں شامل کیاگیا ہے انہوں نے ہدایت کی کہ والڈ سٹی اتھارٹی خالی مقامات پر فوری ڈویلپمنٹ ورک شروع کرے اپ گریڈیشن شروع ہوتے ہی پولیس ،ریسکیو،اوقاف اور آرکیالوجی ڈیپارٹمنٹ کو متبادل مقامات پر شفٹ کیاجائے گا۔عامر کریم خاں نے واضح کیا کہ والڈ سٹی اتھارٹی قلعہ کہنہ اور ملحقہ پارکوں سمیت تاریخی عمارتوں کو اپ گریڈ کرے گی اس سلسلے میں 4 کروڑ کی لاگت سے قلعہ کہنہ اور سٹیڈیم کے گرد فصیل کو بحال کیا جائے گا،قبل ازیں سینئرر آرکیٹکٹ عظیم داد خان نے قلعہ کہنہ کے میگا پراجیکٹ پر تفصیلی بریفننگ دی۔
ملتان سے مزید