فرمان الہی
نماز کے اوقات
کراچی(این این آئی)پاکستان کی سیاسی جماعتوں کی آن لائن موجودگی اور شفافیت سے متعلق فری اینڈ فیئر الیکشن نیٹ ورک (فافن)کی تازہ رپورٹ نے تشویشناک انکشافات کیے ہیں۔فافن کی رپورٹ کے مطابق ملک کی 166رجسٹرڈ سیاسی جماعتوں میں سے صرف 58کی ویب سائٹس جزوی یا مکمل طور پر فعال ہیں، جو مجموعی تعداد کا محض 35فیصد بنتا ہے۔ جماعت اسلامی کی ویب سائٹ سب سے معلوماتی قرار دی گئی جبکہ پی ٹی آئی کی ویب سائٹ وی پی این کے ذریعے ہی قابلِ رسائی ہے۔فافن کے مطابق سیاسی جماعتوں کی اکثریت آئینی تقاضوں کے باوجود اپنی ویب سائٹس پر بنیادی معلومات فراہم کرنے میں ناکام رہی ہیں۔ صرف 40 جماعتوں نے اپنے مرکزی عہدیداران کی فہرستیں شائع کیں جب کہ ایگزیکٹو کمیٹی کے اراکین کی تفصیلات صرف 6جماعتوں نے مہیا کی ہیں۔ رپورٹ میں کہا گیا ہے کہ سوشل میڈیا پلیٹ فارمز سیاسی جماعتوں کی معلوماتی ذمہ داریوں کا متبادل نہیں بن سکتے۔ رپورٹ کے مطابق جماعت اسلامی کی ویب سائٹ معلومات کی دستیابی کے اعتبار سے سب سے آگے ہے، جہاں 30 میں سے 18اقسام کی معلومات فراہم کی گئی ہیں۔ اسکے برعکس، پاکستان پیپلز پارٹی پارلیمنٹرینز (پی پی پی پی)کی ویب سائٹ نے 12پوائنٹس، پاکستان مسلم لیگ(ن)نے 11، عوامی نیشنل پارٹی نے 9، جبکہ حق دو تحریک بلوچستان(ایچ ڈی ٹی)اور متحدہ قومی موومنٹ پاکستان(ایم کیو ایم-پی)نے 8، سنی اتحاد کونسل اور پشتونخوا ملی عوامی پارٹی(پی کے ایم اے پی)نے 7، تحریک لبیک پاکستان (ٹی ایل پی)اور جمعیت علمائے اسلام پاکستان(جے یو آئی پی)نے 6، مجلس وحدت المسلمین(ایم ڈبلیو ایم)نے 5، بلوچستان عوامی پارٹی نے4اور پاکستان مسلم لیگ قائد(پی ایم ایل-ق) نے صرف 1پوائنٹ حاصل کیا۔ پارلیمانی نمائندگی سے محروم جماعتوں میں پاکستان تحریک شادباد (پی ٹی ایس)نے 13پوائنٹس کے ساتھ سبقت حاصل کی۔
