• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ٹرمپ، کینیڈا پر یکم اگست سے 35 فیصد نئے ٹیکس کی دھمکی، دیگر ممالک کو بھی انتباہ

آج کا اخبار
اہم خبریں
12 جولائی ، 2025
واشنگٹن(اے ایف پی)امریکا کے صدر ڈونلڈ ٹرمپ نے کینیڈین وزیر اعظم مارک کارنی کو ایک خط میں آگاہ کیا ہے کہ یکم اگست سے کینیڈین برآمدات پر35فیصد درآمدی ٹیکس عائد کیا جائے گا، ٹرمپ نے دیگر ممالک کو بھی نئے ٹیکسز کے نفاذ سے متعلق انتباہ کیا ہے ،یہ ٹرمپ کی جانب سے 20ممالک کو دی جانے والی تجارتی جنگ کی دھمکیوں کا تسلسل ہے، ٹرمپ کی تازہ دھمکیوں کے بعد دنیا بھر کی اسٹاک مارکیٹوں میں مندی کا رحجان رہا ، اس دوران بٹ کوائن کی قدر میں تیزی کا سلسلہ جاری رہا جو ایک لاکھ 18ہزار سے زائد کی بلند ترین سطح پر پہنچ گیا۔ عالمی منڈی میں تیل کی قیمتوں میں بھی اضافہ دیکھا گیا ، برینٹ نارتھ سی کروڈ: 2.4 فیصد اضافے کے ساتھ 70.28 ڈالر فی بیرل کا ہوگیا جبکہ ویسٹ ٹیکساس انٹرمیڈیٹ: 2.6 فیصد اضافے کے ساتھ 68.32 ڈالر فی بیرل کا ہوگیا ۔ کینیڈ اور میکسیکو امریکا کے ساتھ آزاد تجارتی معاہدے کی بحالی کیلئے کوشاں، اپنے کارکنوں اور کاروبار کا دفاع کرینگے،کینیڈین وزیر اعظم مارک کارنی نے جمعرات کی شب سوشل میڈیا پلیٹ فارم ’ایکس‘ پر لکھا کہ ’امریکا کے ساتھ جاری تجارتی مذاکرات کے دوران کینیڈین حکومت نے مسلسل اپنے ورکرز اور بزنسز کا دفاع کیا ہے، ہم اس مؤقف پر قائم رہیں گے اور اب یکم اگست کی نئی ڈیڈ لائن کے تحت آگے بڑھیں گے۔خبر رساں ادارے ’اے ایف پی‘ کے مطابق یہ اعلان اس ہفتے کے دوران ٹرمپ کی جانب سے مختلف ممالک کو بھیجے گئے 20 سے زائد ایسے خطوط میں تازہ ترین ہے، جو ان کی تجارتی جنگ کی دھمکیوں کا تسلسل ہے۔کینیڈا اور امریکا کے درمیان تجارتی مذاکرات جاری تھے جن کا مقصد 21 جولائی تک کسی معاہدے تک پہنچنا تھا، تاہم اب یہ نئی دھمکی اس ڈیڈ لائن کو یکم اگست تک منتقل کرنے کا اشارہ دے رہی ہے۔کینیڈا اور میکسیکو دونوں کوشش کر رہے ہیں کہ ٹرمپ کو کسی حد تک مطمئن کیا جا سکے تاکہ تینوں ممالک کے درمیان آزاد تجارتی معاہدہ ’یو ایس ایم سی اے‘ دوبارہ بحال کیا جا سکے۔یاد رہے کہ ’یو ایس ایم سی اے‘ معاہدہ جولائی 2020 میں سابق ’نافتا‘ معاہدے کی جگہ متعارف کروایا گیا تھا جس کی تجدید آئندہ سال جولائی میں ہونا تھی، مگر ٹرمپ نے جنوری میں دوسری مدتِ صدارت سنبھالنے کے بعد تجارتی جنگ چھیڑ کر اس عمل کو غیر یقینی بنا دیا ہے۔ابتدا میں امریکا نے کینیڈین اور میکسیکن مصنوعات پر 25 فیصد ٹیرف نافذ کیا تھا، تاہم کینیڈین توانائی کے شعبے کو کم شرح پر رکھا گیا، ٹرمپ کا موقف تھا کہ ان دونوں ممالک نے غیر قانونی امیگریشن اور منشیات کی اسمگلنگ روکنے کے لیے کافی اقدامات نہیں کیے۔بعد ازاں ٹرمپ نے یو ایس ایم سی اے کے تحت درآمد ہونے والی کئی اشیا کو ٹیرف سے مستثنیٰ قرار دے دیا تھا۔یہ تازہ خط ایسے وقت میں آیا ہے جب ٹرمپ اور وزیر اعظم کارنی کے تعلقات میں کچھ بہتری دیکھی جا رہی تھی، ٹرمپ نے کئی بار یہ تجویز دی ہے کہ کینیڈا کو امریکا کی 51ویں ریاست بن جانا چاہیے۔دریں اثناء اسٹاک مارکیٹوں میں مندی کارحجان رہا ۔ نیویارک - ڈاؤ: 0.7 فیصد کمی کے ساتھ 44,336.25 پوائنٹس پرنیویارک - ایس اینڈ پی 500: 0.4 فیصد کمی کے ساتھ 6,255.64 پرنیویارک - نیسڈیک کمپوزٹ: 0.2 فیصد کمی کے ساتھ 20,591.27پرلندن - ایف ٹی ایس ای 100: 0.4 فیصد کمی کے ساتھ 8,941.12 پر (اختتامی)پیرس - سی اے سی 40: 0.9 فیصد کمی کے ساتھ 7,829.29 پر (اختتامی)فرینکفرٹ - ڈی اے ایکس: 0.8 فیصد کمی کے ساتھ 24,255.31 پر (اختتامی)ٹوکیو - نِکی 225: 0.2 فیصد کمی کے ساتھ 39,569.68پر (اختتامی)ہانگ کانگ - ہینگ سینگ انڈیکس: 0.5 فیصد اضافے کے ساتھ 24,139.57 پر (اختتامی)شنگھائی - کمپوزٹ: 3,510.18 پر برقرار رہا۔ یورو/ڈالر: جمعرات کو $1.1698 سے کم ہو کر $1.1697 پرپاؤنڈ/ڈالر: $1.3576 سے کم ہو کر $1.3500 پرڈالر/ین: 146.19 ین سے بڑھ کر 147.35ین پریورو/ پاؤنڈ: 86.16 پینس سے بڑھ کر 86.65 پنس پر بند ہوا ۔
اہم خبریں سے مزید