فرمان الہی
نماز کے اوقات
ڈیلس میں پاکستان کا سب سے بڑا جشن آزادی قائد میلہ پاکستان سوسائٹی آف نارتھ ٹیکساس کے زیر اہتمام منعقد ہوا، جس میں ڈیلس سمیت گرد و نواح سے ہزاروں پاکستانی امریکیوں نے شرکت کی اور پاکستان سے اپنی محبت کا بھرپور اظہار کیا۔ قائد میلے میں سفیرِ پاکستان رضوان سعید شیخ بطور مہمان خصوصی شریک ہوئے۔
اس موقع پر خطاب کرتے ہوئے سفیر پاکستان رضوان سعید شیخ نے کہا کہ پاکستان اور امریکا کے درمیان بہترین تعلقات نئے نہیں، جس روز پاکستان وجود میں آیا، اگلے ہی روز امریکی صدر نے قائد اعظم محمد علی جناح کو مبارکباد کا خط لکھا۔
انہوں نے مزید کہا کہ پاک امریکا تعلقات اتنے ہی پرانے ہیں جتنا کہ پاکستان ہے، لیکن حالیہ دنوں میں یہ تعلقات بلندی کی جانب گامزن ہیں۔ اس مضبوط دوستی کو مزید مستحکم کرنے کے لیے میں یہاں آیا ہوں۔
سفیر پاکستان نے کہا کہ میں بطور سفیر مکمل اختیار آپ کے سپرد کرنے آیا ہوں آپ سب امریکا میں پاکستان کے سفیر ہیں۔ ہمیں پاک امریکا تعلقات کو مزید مستحکم کرنے کے لیے یہاں سے کوششیں کرنا ہوں گی، آپریشن بنیان مرصوص اس وقت تک مکمل نہیں ہو سکتا جب تک ہم معاشی طور پر پاکستان کو مستحکم نہیں کریں گے۔
انہوں نے امریکا میں مقیم تمام پاکستانیوں سے اپیل کی وہ مقامی سطح پر وطن عزیز کو مستحکم کرنے کے لیے کوششیں کریں اس ضمن میں انہوں نے کمیونٹی کو اپنے بھر پور تعاون کا یقین بھی دلایا۔
رضوان سعید شیخ نے اس موقع پر آپریشن بنیان مرصوص کی تفصیلات سے آگاہ کرتے ہوئے کہا کہ پاکستان کا دفاع مضبوط ہے۔ چھ اور سات مئی کی درمیانی شب پاکستان نے اقوام متحدہ چارٹر آرٹیکل 51 کے تحت سیلف ڈیفنس کارروائی کی اور اس آپریشن کو بنیان مرصوص کا نام دیا۔
پاکستان کی دفاعی افواج نے تین گھنٹے اور 45 منٹ میں بھارت کی 26 اہم فوجی تنصیبات کو نشانہ بنایا اور مکمل طور پر تباہ کر دیا۔ اس سے قبل بھارت نے پاکستان کے نہتے عوام کو نشانہ بنایا اور انکے حکام اور بھارتی میڈیا جھوٹ بولتے رہے، جبکہ پاکستان کے دفاعی حکام عالمی طاقتوں کو اس دوران حقائق پر مبنی صورتحال سے آگاہ کرتے رہے اور بالآخر سات مئی کو بھرپور جواب دیا گیا اور پوری دنیا نے دیکھا کہ ہم کسی طور کمزور نہیں۔
قبل ازیں تقریب کے آغاز پر صدر پاکستان سوسائٹی آف نارتھ ٹیکساس نعیم سکھیا نے اپنے خطاب میں حاضرین کا شکریہ ادا کرتے ہوئے کہا کہ جب پاکستان کا مطلب لا اله الا الله ہے تو الله تعالیٰ ہی اسکی حفاظت کرے گا، ہمیں اس بات پر یقین ہونا چاہیے لیکن اس کا یہ ہر گز مطلب نہیں کہ ہم اپنی ذمہ داریوں سے غافل ہو جائیں۔
نعیم سکھیا کا کہنا تھا پی ایس این ٹی کے تحت منعقدہ اس قائد میلے میں آپکی بھرپور شرکت اور جوش و جذبہ آپکی وطن عزیز سے محبت کا منہ بولتا ثبوت ہے۔
اس موقع پر پاکستان سوسائٹی کے عہدیداران امین جیوانی، عابد بیگ، بورڈ آف ٹرسٹی کے چیئرمین ڈاکٹر ریاض حیدر، اراکین حفیظ خان، عابد ملک، برکت بسریا، امیر علی روپانی اور شاہ رخ صدیقی بھی موجود تھے جنہوں نے سوسائٹی کے رضا کاروں کو شیلڈ دیں۔
جشن آزادی قائد میلے میں پاکستان سے آئے ہوئے معروف گلوکاروں امیر علی اور صائمہ جہاں نے اپنے گیتوں کے ذریعے سماں باندھ دیا۔ امیر علی نے ملی نغمے گائے اور حاضرین ان ملی نغموں کی دھن پر جھومتے نظر آئے۔ خواتین، مرد، نوجوان اور بالخصوص بچے سبز ہلالی پرچم لہراتے رہے اور پاکستان کا جشن آزادی پورے جوش و خروش سے مناتے دکھائی دیے۔ اس جشن آزادی قائد میلے کی تقریب میں نظامت کے فرائض کرن حیات اور حسن سومرو نے انجام دیے۔
اس موقع پر شرکاء کے لیے پاکستانی روایتی کھانوں، ملبوسات، جیولری اور دیگر سروسز کے اسٹالز بھی حاضرین کی توجہ کا مرکز رہے۔ مسلمانوں کی امریکا میں سب سے بڑی تنظیم اکنا ریلیف نے فری میڈیکل کیمپ بھی لگایا، جہاں حاضرین کو فری اسکریننگ اور طبی مشوروں کی سہولت بھی فراہم کی گئی جن سے لوگ بھرپور مستفید ہوتے دکھائی دیے۔
