فرمان الہی
نماز کے اوقات
قومی ٹیم کے سابق کپتان وسیم اکرم نے اسٹار بیٹر بابر اعظم کو اہم مشورہ دے دیا۔
جیو نیوز کے پروگرام ’ہسنا منع ہے‘ میں گفتگو کرتے ہوئے وسیم اکرم نے کہا کہ بابر اعظم ہمارے سپر اسٹار اور دنیا کے بہترین کھلاڑیوں میں سے ایک ہیں، بابر کو یہی مشورہ دوں گا کہ پُرسکون رہیں، دباؤ سے نکلیں، تنقید کو نظر انداز کریں اور یاد رکھیں کہ فارم وقتی ہوتی ہے لیکن کلاس ہمیشہ کے لیے ہے، محنت جاری رکھیں، آپ دوبارہ دنیا کے بہترین بیٹرز میں شمار ہوں گے۔
انہوں نے کہا کہ بابر اعظم کے پاس میچ ونر کی تمام صلاحیتیں اور ٹیلنٹ موجود ہے، اب وقت آگیا کہ وہ اپنی بیٹنگ سے میچز جتوا کر اپنا لوہا منوائیں۔
وسیم اکرم نے اپنے کرکٹ کے دنوں میں ٹیم کے اندرونی اختلافات پر بھی کھل کر بات کی، ان دنوں کو یاد کیا جب وہ ساتھی کھلاڑیوں کے درمیان انا پرستی اور جھگڑوں کے ماحول میں پھنس جاتے تھے۔
ان کا کہنا تھا کہ ان تنازعات میں بعض اوقات میرے قریبی دوست بھی شامل ہوتے تھے، اُس وقت ٹیم نسبتاً نوجوان کھلاڑیوں پر مشتمل تھی اور مناسب رہنمائی و سینئرز کی کمی کے باعث اختلافات کو سنبھالنا مشکل ہو جاتا تھا۔
وسیم اکرم نے ان جھگڑوں کو اُس وقت کی ناپختگی اور کم عمری کا نتیجہ قرار دیتے ہوئے بتایا کہ بعد میں کئی کھلاڑیوں نے اپنی غلطیوں کا اعتراف بھی کیا۔
لیجنڈری فاسٹ بولر نے حالیہ دنوں میں اپنے اور بھارت کے اسٹار پیسر جسپریت بمراہ کے درمیان ہونے والے موازنے پر ردِعمل میں کہا کہ اس طرح کے موازنے دراصل میرے لیے یا بمراہ کے لیے کوئی معنی نہیں رکھتے بلکہ یہ صرف سوشل میڈیا صارفین اور شائقین کے درمیان زیرِ بحث رہتے ہیں۔
انہوں نے بمراہ کی تعریف کرتے ہوئے کہا کہ وہ ایک بہت شاندار اور متاثرکن بولر ہیں۔
پاکستان کے لیجنڈری کرکٹر اور سوئنگ کے سلطان وسیم اکرم نے اپنی زندگی کا ایک دلچسپ واقعہ بھی شیئر کردیا۔
پروگرام کے دوران تابش ہاشمی نے بتایا کہ میں شارجہ اسٹیڈیم میں ایک تقریب کی میزبانی کر رہا تھا، انہوں نے جب وسیم اکرم کو اسٹیج پر بلایا تو شائقین نے تالیاں تو بجائیں مگر جوش و خروش توقع سے کم تھا، لیکن جیسے ہی میں نے مشہور ٹک ٹاکر مسٹر پٹلو کو اسٹیج پر مدعو کیا تو پورا مجمع خوشی سے جھوم اٹھا اور ہال تالیوں سے گونج گیا، یہ منظر دیکھ کر خود وسیم اکرم بھی حیران رہ گئے۔
انہوں نے ہنستے ہوئے کہا کہ میں اور تابش پردے کے پیچھے کھڑے یہ سوچ رہے تھے کہ آخر لوگوں کو کس بات پر اتنی شہرت مل جاتی ہے۔
وسیم اکرم نے ساتھ ہی یہ بھی تسلیم کیا کہ کانٹینٹ کریئشن ایک مشکل کام ہے اور ٹک ٹاک ویڈیوز بنانا بھی محنت اور وقت مانگتا ہے۔
