فرمان الہی
نماز کے اوقات
امریکا کے معروف قدامت پسند نوجوان رہنما اور ٹرننگ پوائنٹ یو ایس اے کے سی ای او و شریک بانی چارلی کرک کی ہلاکت کی خبر بتاتے ہوئے امریکی صحافی میگن کیلی لائیو شو کے دوران آبدیدہ ہوگئیں۔
چارلی کرک یوٹاہ ویلی یونیورسٹی میں ٹرننگ پوائنٹ یو ایس اے کے ایک پروگرام کے دوران خطاب کر رہے تھے کہ اچانک نامعلوم حملہ آور نے فائرنگ کر دی، گولی ان کے گلے کے قریب لگی جس کے باعث وہ موقع پر ہی چل بسے، واقعے کی ویڈیوز سوشل میڈیا پر تیزی سے وائرل ہوئیں جس میں شرکاء کو بھاگتے اور چیختے دیکھا جا سکتا ہے۔
امریکی صحافی اور میزبان میگن کیلی نے اپنے یوٹیوب شو دی میگن کیلی شو میں لائیو بیٹھے یہ خبر دی اور روتے ہوئے کہا، ’کچھ ذرائع یہ رپورٹ کر رہے ہیں کہ چارلی دنیا میں نہیں رہے، وہ صرف 31 برس کے تھے، یہ کہنا میرے لیے بے حد مشکل ہے۔‘
انہوں نے مزید کہا کہ میں معذرت خواہ ہوں کہ مجھے یہ خبر آپ تک پہنچانی پڑ رہی ہے، یہ ملک کے لیے ایک بڑا نقصان ہے، چارلی کے لیے، ان کے خاندان کے لیے۔
لائیو شو میں موجود بلَیز میڈیا کے سی ای او گلن بیک بھی غم سے نڈھال نظر آئے اور کہا کہ ایسا ممکن ہی نہیں کہ وہ اس فائرنگ میں بچ پاتے۔
