فرمان الہی
نماز کے اوقات
پاکستانی شوبز کے ایک معروف گھرانے سے تعلق رکھنے والی اداکارہ انوشے عباسی نے انکشاف کیا ہے کہ ان کی شادی 2019ء میں ختم ہوچکی تھی۔
انوشے عباسی نے یہ انکشاف اداکارہ اُشنا شاہ کے شو میں گفتگو کے دوران کیا اور اپنی طلاق پر کھل کر بات کی۔
انوشے شمعون عباسی اور جویریہ عباسی کی فیملی سے تعلق رکھتی ہیں اور خود بھی کئی مشہور ڈراموں میں اپنی اداکاری کے جوہر دکھا چکی ہیں۔ انہوں نے 2014ء میں اداکار عینان عارف سے شادی کی تھی اور اس وقت ان کی شادی کی تصویریں خوب وائرل ہوئی تھیں۔
تاہم اب انہوں نے بتایا ہے کہ وہ 2019ء میں ہی شوہر سے علیحدہ ہو چکی تھیں لیکن اس وقت اپنی والدہ کی شدید علالت کے باعث یہ خبر عوام سے چھپائی تھی۔
اداکارہ کا کہنا تھا کہ میں نہیں چاہتی تھی کہ لوگ میری والدہ سے ملاقات کے دوران ان کی صحت کے بجائے میری طلاق پر سوالات کریں، اس لیے میں نے اتنے بڑے فیصلے کو میڈیا سے پوشیدہ رکھا۔
انہوں نے کہا کہ والدہ کے علاوہ بھی میں نہیں چاہتی تھی کہ کوئی اس بارے میں بات کرے، اس لیے طلاق کے بارے میں کسی کو خبر نہیں ہونے دی، اس تمام عرصے کے دوران میرے زخم بھر گئے اور یہی وجہ ہے کہ اب میں عوامی سطح پر اس پر بات کر رہی ہوں۔
انوشے کے مطابق 2021ء میں والدہ کے انتقال کے بعد حالات مزید مشکل ہوگئے تھے، لیکن پوری فیملی نے ایک دوسرے کا ساتھ دیا اور ایک دوسرے کا خیال رکھا۔
