فرمان الہی
نماز کے اوقات
پاکستان کو ڈیجیٹل دنیا سے مزید مضبوطی کے ساتھ جوڑنے کی جانب ایک اہم پیش رفت سامنے آئی ہے۔
عالمی سطح کی سب میرین کیبل سی می وی 6 (SE-ME-WE 6) کراچی کے ساحلی مقام ہاکس بے پر پہنچ گئی۔
کیبل بچھانے کی تقریب ہاکس بے کے ساحل پر منعقد کی گئی، جس میں وفاقی سیکریٹری وزارتِ آئی ٹی ضرار احمد خان نے بھی شرکت کی۔
حکام نے بتایا کہ ٹرانس ورلڈ کی جانب سے سمندر میں کیبل بچھانے کا کام تیزی سے جاری ہے، یہ کیبل مجموعی طور پر 21 ہزار 700 کلو میٹر طویل ہے اور سنگاپور سے شروع ہو کر فرانس تک جاتی ہے، جس کے راستے میں کراچی کا ایک اہم پوائنٹ شامل ہے۔
حکام کے مطابق سی می وی 6 کے ذریعے پاکستان دنیا کے متعدد ممالک سے مزید مضبوط ڈیٹا لنکس کے ساتھ منسلک ہو جائے گا۔
وفاقی سیکریٹری وزارتِ آئی ٹی ضرار احمد خان نے کہا کہ پاکستان نے کنیکٹیویٹی کے میدان میں ایک تاریخی سنگِ میل عبور کیا ہے۔
ان کا کہنا ہے کہ سی می وی 6 ایک بین الاقوامی کیبل سسٹم ہے اور یہ پاکستان کی مجموعی طور پر نویں جبکہ صرف گزشتہ 1 سال میں تیسری سب میرین کیبل ہے جو ملک کی ڈیجیٹل ترقی کے سفر میں اہم سنگِ میل ہے۔
وفاقی سیکریٹری وزارتِ آئی ٹی ضرار احمد خان نے بتایا کہ نئی کیبل کی ابتدائی صلاحیت 4 ٹیرا بائٹس فی سیکنڈ ہے جو آئی ٹی سمیت دیگر شعبوں کو مضبوط ڈیٹا اسپیڈ اور بہتر رابطے فراہم کرے گی۔
