• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

وفاقی وزیر داخلہ کی ریاض میں سعودی ہم منصب سے اہم ملاقات

آج کا اخبار
ملک بھر سے
26 نومبر ، 2025
ریاض (اے پی پی) وفاقی وزیر داخلہ محسن نقوی نے اپنے دورہ سعودی عرب کے دوران سعودی وزیر داخلہ شہزادہ عبدالعزیز بن سعود بن نائف سے اہم ملاقات کی، جس میں دوطرفہ سکیورٹی تعاون کو مزید مضبوط بنانے، پولیس اور پیرا ملٹری فورسز کے درمیان ٹریننگ ایکسچینج پروگرام اور علاقائی سلامتی کے امور پر تفصیلی تبادلہ خیال کیا گیا۔ ملاقات میں برمی (روہنگیا) مسلمانوں کے لیگل اسٹیٹس کے دیرینہ مسئلے کے حل پر بھی گفتگو ہوئی۔ سعودی وزیر داخلہ نے اس اہم انسانی مسئلے کو اجاگر کرنے اور اس کے حل کے لیے کوششوں پر وفاقی وزیر داخلہ محسن نقوی کا شکریہ ادا کیا۔اس موقع پر سعودی وزیر داخلہ نے فیڈرل کانسٹیبلری کے ہیڈ کوارٹر پر حملے میں شہید ہونے والے اہلکاروں کی فیملیز سے بھی تعزیت کا اظہار کیا۔ دونوں ممالک کے درمیان وزارت داخلہ کے ورکنگ گروپ کا اجلاس اگلے ماہ منعقد کرانے کا بھی فیصلہ کیا گیا۔محسن نقوی نے کہا کہ سعودی عرب ہر پاکستانی کا دوسرا گھر ہے اور ہمیں سعودی عرب کے ساتھ اپنے دیرینہ ، مضبوط اور پائیدار تعلقات پر فخر ہے۔ ملاقات میں وفاقی سیکرٹری داخلہ محمد خرم آغا، پاکستان کے سفیر احمد فاروق، کمانڈنٹ فیڈرل کانسٹیبلری نذیر گاڑا، کمانڈنٹ نیشنل پولیس اکیڈمی محمد ادریس اور سعودی وزارت داخلہ کے اعلی حکام بھی موجود تھے۔
ملک بھر سے سے مزید