فرمان الہی
نماز کے اوقات
امریکی سینیٹ میں 25 گھنٹے سے زائد تقریر کرنے کا ریکارڈ بنانے والے سینیٹر کوری بوکر نے شادی کر لی۔
واشنگٹن ڈی سی میں نیو جرسی کے سینیٹر کوری بُوکر نے اپنی منگیتر الیکسس لوئس سے شادی کر لی ہے، جس کا اعلان انہوں نے صرف 3 ماہ قبل انسٹاگرام پر اپنی منگنی کی خبر دیتے ہوئے کیا تھا۔
امریکی میڈیا کے مطابق شادی کی تقریب بین المذہبی انداز میں ہوئی، جس میں ایک پادری اور ایک ربی نے شرکت کی، لوئس یہودی اور بُوکر مسیحی ہیں، جبکہ شادی میں صرف قریبی خاندان کے افراد موجود تھے، شادی کی جگہ کا تعین رازداری کے لیے خفیہ رکھا گیا۔
جوڑے نے پیر کو نیوآرک میں یو ایس ڈسٹرکٹ کورٹ میں قانونی طور پر بھی شادی کی، جہاں بُوکر نے بطور میئر شہرت حاصل کی تھی۔
اس موقع پر دونوں کے والدین گواہ کے طور پر موجود تھے۔
کوری بُوکر اور الیکسس لوئس کی ملاقات مئی 2024ء میں ایک مشترکہ دوست کے ذریعے ہوئی، جس کے بعد دونوں ایک دوسرے کے قریب آئے۔
بُوکر نے 24 اگست کو الیکس لوئس کو پروپوز کیا تھا۔
الیکسس لوئس واشنگٹن ڈی سی کی رہائشی ہیں، انہوں نے نیو یارک یونیورسٹی سے بیچلر اور کورنل یونیورسٹی سے ایم بی اے کیا ہے اور آج کل برسا کیپیٹل مینجمنٹ میں ڈائریکٹر آف انویسٹمنٹ ہیں۔
خیال رہے کہ نیو جرسی سے ڈیموکریٹک سینیٹر کوری بوکر نے یکم اپریل کو تاریخ رقم کرتے ہوئے سینیٹ کے فلور پر 25 گھنٹے سے زیادہ وقت تک خطاب کرتے ہوئے آنجہانی علیحدگی پسند سینیٹر اسٹروم تھرمنڈ کا سابق ریکارڈ توڑ دیا تھا۔
ساتھی سینیٹرز سے سوالات لینے کے لیے صرف کبھی کبھار توقف کے ساتھ کوری بوکر نے 25 گھنٹے اور 4 منٹ خطاب کیا، جو کہ شہری حقوق کے ایکٹ کے خلاف اسٹورم تھرمنڈ کے 1957ء کے خطاب سے 46 منٹ زیادہ ہے۔
سینیٹر کوری بُوکر نے تقریر کے آغاز پر کہا تھا کہ وہ جب تک جسمانی طور پر قابل ہیں، یہ تقریر جاری رکھیں گے۔
