فرمان الہی
نماز کے اوقات
پاکستان پیپلز پارٹی امریکا نے تنظیمی ڈھانچے کو مزید فعال بنانے کے لیے اہم فیصلہ کرتے ہوئے امیر مکھانی کو پارٹی کا مرکزی نائب صدر مقرر کر دیا۔
اس سلسلے میں جاری ہونے والے باضابطہ نوٹیفکیشن کے مطابق یہ تقرری فوری طور پر نافذ العمل ہو گی، نوٹیفکیشن پاکستان پیپلز پارٹی امریکا کے صدر محمد خالد اعوان کی جانب سے جاری کیا گیا جس میں کہا گیا ہے کہ پارٹی قیادت کو امید ہے کہ امیر مکھانی اس ذمہ داری کو بھرپور انداز میں نبھاتے ہوئے پارٹی، اس کی قیادت اور تنظیم کو مزید مضبوط بنانے میں کردار ادا کریں گے۔
نوٹیفکیشن پر جنرل سیکرٹری پی پی پی امریکا ملک محمد علی اعوان اور ڈپٹی جنرل سیکرٹری ڈاکٹر عظمٰی گل کے دستخط بھی موجود ہیں جبکہ اس تقرری کی کاپی چیئرمین پاکستان پیپلز پارٹی بلاول بھٹو زرداری، سیکرٹری جنرل پی پی پی، زرداری ہاؤس اسلام آباد اور پی پی پی اوورسیز کوآرڈینیشن کمیٹی کو ریکارڈ اور اطلاع کے لیے ارسال کی گئی ہے۔
اس موقع پر پاکستان پیپلز پارٹی امریکا اور ریاست ٹیکساس کی عہدیداران نے امیر مکھانی کی پی پی پی میں بحیثیت مرکزی نائب صدر نامزدگی پر خوشی کا اظہار کرتے ہوئے کہا ہے کہ امیر مکھانی وہ رہنما ہیں جو پہلے ہی پاکستان کے شہر کراچی کے پسماندہ علاقوں میں خواتین کا معیار زندگی بہتر بنانے اور انہیں خودمختیار بنانے کے لیے گزشتہ پانچ برسوں سے عملی جدوجہد کر رہے ہیں۔
ان کے مطابق امیر مکھانی نے مکھانی ویلفیئر کے زیر انتظام ہنر اور ووکیشنل تعلیم کے ذریعے ابتک دس ہزار سے زائد خواتین کو اپنے پاؤں پر کھڑا کیا ہے اور یہ تمام کام وہ اب تک اپنی ذاتی جیب سے کر رہے ہیں۔
پارٹی رہنماؤں کا کہنا تھا کہ ایسی باصلاحیت، مخلص اور خدمت گزار شخصیات کے پارٹی عہدوں پر آنے سے پاکستان پیپلز پارٹی میں مزید مثبت سوچ، وژن اور عوامی خدمت کے جذبے کو تقویت ملے گی۔
