• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بڑی اسکرینیں، چائے، کھانے، میچ دیکھنے کیلئے انتظامات لیکن شہری مایوس

آج کا اخبار
اسپورٹس
16 فروری ، 2026
کراچی (اسٹاف رپورٹر) کولمبو میں پاک بھارت ٹی ٹوئنٹی میچ دیکھنے کیلئے کراچی اور اندورن سندھ بھر پور جوش وجذبہ نظر آیا۔ لوگوں نے خصوصی انتظامات کئے، پارکوں، میدانوں ، آڈیٹوریم، کھیلوں کے جمنازیم میں بڑی اسکرینز نصب کی گئی۔ کئی مقامات پر چائے اور پانی کا بھی خصوصی انتظام کیا گیا تھا۔لیکن شکست پر شہری مایوس ہوگئے۔ کراچی میں مختلف علاقوں میں لگائی گئی اسکرینوں پر بڑی تعداد میں شہریوں نے میچ دیکھا، جہاں نعرے بازی بھی عروج پر رہی، پاکستانی بیٹرز کے آئوٹ ہونے پر مداحوں نے باہر نکالو کے نعرے بھی لگائے۔ سڑکوں پر ٹریفک کی روانی کم دکھائی دی، شادی ہالوں میں مہمان بھی تاخیر سے پہنچے تاہم وہ بھی ہال کے دفتر میں لگے ٹی وی سیٹ پر میچ سے لطف اندوز ہوتے رہے۔ جو مارکیٹیں کھلی تھیں وہ بھی میچ کے آغاز سے قبل بند ہوگئیں، دوکاندار بھی موبائل پر میچ سے لطف اندوز ہوتے رہے، پولیس اور دیگر سیکیورٹی اداروں کے اہلکار بھی میچ کے نتائج سے آگہی میں مصروف نظر آئے۔ محلوں اور گلیوں میں چھٹی والے دن بچے بھی کھیل کود کی جگہ میچ دیکھنے میں مصروف رہے۔
اسپورٹس سے مزید