فرمان الہی
نماز کے اوقات
رمضان المبارک رحمتوں اور برکتوں کا خاص مہینہ ہے اور اس مقدس مہینے میں افطاری کے دستر خوان کی رونقیں دوبالا ہو جاتی ہیں۔
دن بھر کے روزے کے بعد جب اہلِ خانہ ایک ساتھ بیٹھتے ہیں تو لذیذ اور گرما گرم پکوان افطار کا لطف اور بھی بڑھا دیتے ہیں۔
ایسے ہی مزیدار اور منفرد ذائقے کے لیے تکہ سموسہ ایک بہترین انتخاب ہے، جو روایتی سموسوں سے ہٹ کر مسالے دار چکن تکے کے ذائقے کے ساتھ سب کو بھا جاتا ہے جس کی آسان سی ترکیب پیشِ خدمت ہے۔
چکن بریسٹ 2 عدد، لیموں کا رس 2 کھانے کے چمچ، تکہ مسالہ 2 سے 3 کھانے کے چمچ، سموسہ پٹی 10 عدد، انڈہ 1 عدد (پھینٹا ہوا)، لہسن ادرک کا پیسٹ 1 کھانے کا چمچ، نمک حسبِ ضرورت۔
چکن بریسٹ پر اچھی طرح تکہ مسالہ لگا کر ایک گھنٹے کے لیے میری نیٹ کر لیں۔
ایک پین میں 2 سے 3 کھانے کے چمچ تیل گرم کر کے اس میں چکن شامل کرلیں اور پکائیں یہاں تک کہ چکن گل جائے، اب اسے فوڈ پروسیسر میں پیس لیں اور باقی کے تمام اجزاء بھی شامل کر دیں۔
پھر سموسہ پٹی میں چکن مکسچر رکھ کر سموسے کی شکل میں فولڈ کریں اور انڈے کی مدد سے کناروں کو بند کر لیں۔
گرم تیل میں سنہرا ہونے تک ڈیپ فرائی کریں، افطاری میں کیچپ کے ساتھ گرما گرم سرو کریں۔
