فرمان الہی
نماز کے اوقات
بالی ووڈ کے ’بھائی جان‘ سلمان خان عید کے موقع پر اپنی رہائش گاہ کے باہر جمع ہونے والے مداحوں سے روایتی انداز میں ملے۔
اس موقع کو مزید دل کو چھو لینے والا بنانے والی بات ان کے والد سلیم خان کی موجودگی تھی، جو ایک ماہ تک اسپتال میں رہے اور ڈسچارج ہونے کے بعد پہلی بار عوام کے سامنے نظر آئے۔
بھارتی میڈیا کی رپورٹ کے مطابق سلمان خان کو ممبئی میں اپنی رہائش گاہ پر اہلِ خانہ کے ساتھ عید مناتے دیکھا گیا۔ اداکار نے اپنے گھر کے باہر موجود مداحوں کو خوش آمدید کہنے کے لیے وقت نکالا، جو ان کی ایک جھلک دیکھنے کے منتظر تھے۔ انہوں نے ہجوم کی جانب ہاتھ ہلایا، سلام کیا اور محبت پر شکریہ ادا کیا۔
سلمان خان کے ساتھ بیٹھے ان کے والد سلیم خان نے بھی مداحوں کو ہاتھ ہلا کر خوش آمدید کہا جبکہ سلمان اور ارباز خان دونوں اپنے والد کو مداحوں سے ملتے دیکھ کر مسکراتے رہے۔
معروف رائٹر سلیم خان اسپتال سے چار روز قبل ڈسچارج ہونے کے بعد پہلی بار منظر عام پر آئے۔
بعد ازاں سلمان خان کا پورا خاندان، جس میں سہیل خان، ان کی والدہ سلمیٰ خان، بھتیجی آیت اور دیگر افراد شامل تھے، بھی کھڑکی پر آگئے اور مداحوں کو مبارکباد دی اور پاپارازی کے لیے پوز دیا۔
سلمان بھورے رنگ کی ٹی شرٹ میں ملبوس تھے، جبکہ ان کے والد سلیم خان نے سیاہ و سفید چیک والی شرٹ پہن رکھی تھی۔
سلمان نے یہ ویڈیو انسٹاگرام پر بھی شیئر کی اور مداحوں کا شکریہ ادا کیا۔ انہوں نے لکھا: ’’عید مبارک، آپ کی دعاؤں کا بہت شکریہ۔ والد صاحب گھر واپس آ گئے ہیں، شکریہ۔‘‘
