میرے خلاف عمران کے الزامات،چیف جسٹس فل بنچ بنائیں،شہباز شریف

  قصور،پتوکی،لاہور( نمائندہ جنگ،نامہ نگار،جنرل رپورٹر ) پاکستان مسلم لیگ کے قائم مقام صدر اور وزیر اعلیٰ پنجاب شہباز شریف نے کہا ہے کہ میرے خلاف عمران کے الزامات پر چیف جسٹس فل بینچ بنائیں، عمران خان نے پشاور کو کھنڈر بنا دیا، حکومت ملی تو کراچی کو لاہور بنا دیں گے،نواز شریف پاکستان کی آن ہیں،وہ لوگوں کے دلوں میں بستے ہیں،عمران خان 5 سال تک جھوٹ بولتے رہے،پیپلز پارٹی نے کراچی کو کوڑے کا ڈھیر بنا دیا،قصور میں یونیورسٹی بنائیں گے،عوام نے ساتھ دیا تو آئندہ انتخابات میں پورے پاکستان میں مسلم لیگ (ن) کی حکومت ہوگی۔ پتوکی میں جلسے سے خطاب کرتے ہوئے انہوں نے کہا کہ نواز شریف کی صدارت کو تو ختم کردیا گیا لیکن نواز شریف کی محبت لوگوں کے دلوں سے نہیں جاسکتی،نواز شریف مسلم لیگ (ن) کے ہمیشہ قائد رہیں گے۔ انہوں نے کہا کہ عمران خان پر عوام نے اعتماد کرکے ووٹ دیا لیکن انہوں نے صوبے کے معاشی حالات کا بیڑہ غرق کردیا اور 2014 میں دھرنا دے کر قوم کا وقت ضائع کیا۔ان کا کہنا تھا (ن) لیگ نے اپنے اقتدار میں اربوں ڈالر کی سرمایہ کاری سے لوڈ شیڈنگ ختم کردی ہے اور گزشتہ 3 سال سے کھاد آدھی قیمت پر مل رہی ہے اور چھوٹے کسان کو بنا سود کے قرضے مل رہے ہیں جبکہ غریب بچوں کو تعلیم کے لیے وظیفے دیے اور سڑکیں، ہسپتال اور اسکول بنائے۔شہباز شریف کا کہنا تھا کہ 4 ماہ بعد انتخابات آنے والے ہیں اور اگر عوام نے (ن) لیگ کو ووٹ دیا تو قصور میں یونیورسٹی بنائیں گے اور پتو کی سے دو طرفہ سڑک بنائیں گے۔ کراچی کے حوالے سے بات کرتے ہوئے ان کا کہنا تھا کہ کراچی میں ٹوٹی ہوئی بسیں چلتی ہیں، ہر طرف کچرے کا ڈھیر ہے لیکن میں یہ کہنا چاہتا ہوں کہ اگر کراچی والوں نے (ن) لیگ کو ووٹ دیا تو کراچی کو لاہور بنادیں گے۔ عمران خان پر تنقید کرتے ہوئے ان کا کہنا تھا کہ چیئرمین تحریک انصاف نے ساڑھے 4 سال ضائع کردیے اور کوئی کام نہیں کیا بلکہ میٹرو بنانے کے لیے پورا پشاور کھود دیا ہے لیکن اگر ہماری حکومت آئی تو ہم ایک سال میں پشاور میں میٹرو بنائیں گے۔انہوں نے کہا کہ عمران خان اتنا جھوٹ بولتے ہیں کہ انہیں جھوٹوں کی پارٹی بنا لینی چاہیے اور میں نے اسی جھوٹ پر عمران خان کے خلاف 10 ارب ہرجانے کا دعویٰ کیا اور میں سپریم کورٹ سے درخواست کرتا ہوں کہ وہ اس جھوٹ پر نوٹس لیں۔ شہباز شریف کا کہنا تھا کہ عمران خان نے اپنی جھوٹی باتیں ثابت کردی تو میں سیاست چھوڑدوں گا لیکن اگر وہ ثابت نہیں کرسکے تو انہیں گھر چلے جانا چاہیے۔ انہوں نے کہا کہ میں نے عمران خان صاحب کے خلاف 10ارب روپے ہرجانے کا وعوی دائر کیا ،پھر 27ارب روپے کا نوٹس بھجوایا لیکن یہ خان صاحب عدالت میں آتے ہی نہیں ۔کل یہ ملتان میٹروبس اورسبحان خان نامی شخص کے بارے میں الزامات کا ایک اور پلندہ لیکر آگئے میری عدالت عظمیٰ اورعدالت عالیہ کے چیف جسٹس صاحبان سے درخواست ہے کہ معاملے کی تحقیقات کیلئے فل بنچ بنایا جائےانہوں نے کہا کہ دوسری طرف زرداری صاحب ہے جن کی حکومت نے کراچی شہر کا بیڑہ غرق کردیا،کراچی کبھی ہمارا بہت خوبصورت اورروشنیوں کا شہر ہوتا تھا اب ہر جگہ کوڑا کرکٹ نظر آتا ہے اورکھٹارا بسیں چل رہی ہیں۔کراچی کی اس ناگفتہ بہ صورتحال دیکھ کر افسوس ہوتا ہے،اگر عوام نے 2018ء کے انتخابات میں پاکستان مسلم لیگ(ن) کو کامیاب کرایا تو پشاوراور کراچی کو لاہور کی طرح ترقی یافتہ شہر بنائیں گے۔ وزیراعلیٰ پنجاب محمد شہبازشریف نے منگل کے روز ضلع قصور کی تحصیل پتو کی کا دورہ کیا اوریہاں مکمل ہونے والے مختلف منصوبوں کے افتتاح کے علاوہ نئے منصوبوں کا سنگ بنیاد بھی رکھا۔وزیراعلیٰ نے ہالہ روڈ بائی پاس پتوکی کے دونوں اطراف کی آبادیوں کو ملانے کیلئے اوورہیڈ برج کا سنگ بنیاد رکھا۔35 کروڑ روپے لاگت سے یہ منصوبہ رواں برس جولائی میں مکمل ہوگااورمنصوبے کی تکمیل سے شہریوں کو آمد و رفت کی بے پناہ سہولت میسر آئے گی۔ وزیراعلیٰ نے10 کروڑ روپے سے زائد کی لاگت سے تعمیر ہونے والے گورنمنٹ کالج الہ آباد کابھی افتتاح کیا۔وزیراعلیٰ نے تحصیل ہیڈکوارٹر ہسپتال کوٹ رادھا کشن کا بھی افتتاح کیا۔اس منصوبے پر تقریباً 11 کروڑ روپے لاگت آئی ہے ۔وزیراعلیٰ محمد شہبازشریف نے پتو کی میں ایک بڑے جلسہ عام سے خطاب کرتے ہوئے کہا کہ پاکستان مسلم لیگ(ن) کی حکومت نے ضلع قصورکی تعمیروترقی پر اربوں روپے کے وسائل خرچ کیے ہیں اوریہاں تعلیم اورصحت کے علاوہ انفراسٹرکچرکے منصوبے مکمل کیے ہیں ۔وزیراعلیٰ نے کنگن پورپتوکی دورویہ سڑک کی تعمیر،پتوکی سے ھلہ کیلئے نئی سڑک اورپھول نگر میں ہسپتال کے قیام کا اعلان کیا۔وزیراعلیٰ نے قصور میں یونیورسٹی کے قیام، پتوکی کیلئے 10سپیڈو بسیں دینے اورپتوکی اورچونیاں میں نئے شاندار پبلک پارک بنانے کا بھی اعلان کیا ۔وزیراعلیٰ محمد شہبازشریف نے جلسہ عام سے خطاب کرتے ہوئے کہا کہ جب زرداری نے پنجاب میں گورنر راج لگایا تھاتو میں پتو کی آیا تھا اورعوام کے ٹھاٹھے مارتے ہوئے سمندر نے اس گورنر راج کا خاتمہ کردیا تھا ۔آج ایک بار پھر پتوکی میں عوام کا ٹھاٹھے مارتا ہوا سمندر اس بات کی گواہی دے رہا ہے کہ 2018ء میں پاکستان مسلم لیگ(ن) کی حکومت پورے ملک پر ہوگی۔انہوں نے کہا کہ محمد نوازشریف نے آج مجھ ناچیز کا نام لے کرمجھے مسلم لیگ(ن) کا قائم مقام صدر منتخب کرایا ہے۔انہوں نے کہا کہ اورنج لائن میٹروٹرین کے عظیم فلاحی منصوبے کو آزمائشی بنیادوں پر چلایاگیاہے جس کی میں عوام کو مبارکباد دیتا ہوں ۔یہ منصوبہ جلد چلے گا اورعوام کو باوقارسفری سہولتیں فراہم کرے گااورمیں عوام کو اس ٹرین میں سوار ہوکر خود سیر کراؤں گا۔انہوں نے کہا کہ چار ماہ بعدالیکشن ہونے ہیں اوراگر ہمیں خدمت کا موقع ملا تو وعدہ کرتا ہوں کہ قصور میں یونیورسٹی کے منصوبے پر جلد کام شروع کردیا جائے گااوراس طرح ضلع قصور کیلئے جن ترقیاتی منصوبوں کا اعلان کیا گیا ہے انہیں بھی تیزرفتاری سے آگے بڑھائیں گے۔ ۔پاکستان مسلم لیگ(ن) نے دن رات محنت کر کے خلوص دل سے عوام کی خدمت کی ہے،ہم ملک سے غربت اوربے روز گاری کا خاتمہ کریں گے اور ملک کو صحیح معنوں میں قائدؒو اقبالؒ کا پاکستان بنائیں گے۔سپیکر پنجاب اسمبلی رانا محمد ا قبال خان ،علاقے کے اراکین قومی و صوبائی اسمبلی اورلوگوں کی بڑی تعداد پنڈال میں موجود تھی۔