چوہدری شوگر مل کیس کارپوریٹ فراڈ ہے: شہزاد اکبر

30 جنوری ، 2020

شہزاد اکبر کی اسلام آباد میں نیوز کانفرنس

وزیرِ اعظم عمران خان کے معاونِ خصوصی برائے احتساب شہزاد اکبر کہتے ہیں کہ چوہدری شوگر مل کیس بہت بڑے کارپوریٹ فراڈ کی دلچسپ داستان ہے۔

اسلام آباد میں نیوز کانفرنس کرتے ہوئے شہزاد اکبر نے کہا کہ چوہدری شوگر مل کے ذریعے شریف خاندان نے منی لانڈرنگ کی، نیو اسلام آباد ایئر پورٹ کے اکاؤنٹ سے چوہدری شوگر ملز کو پیسے بھجوائے گئے۔

انہوں نے کہا کہ شہباز شریف نے اب تک میرے سوالات کا جواب نہیں دیا، چوہدری شوگر ملز کو آف شور کمپنی بنا کر 15 ملین ڈالرقرض لیا گیا۔

یہ بھی پڑھیئے: شہزاد اکبر کی ٹرانسپیرنسی رپورٹ پر ضروری وضاحت

شہزاد اکبر نے کہا کہ شیڈرون جرسی کے نام سے ایک کمپنی بنائی گئی، 90ء کی دہائی میں قرض کا بڑا کاروبار تھا، قاضی فیملی کے نام سے پاکستان میں اکاؤنٹ کھولے گئے۔

انہوں نے کہا کہ قرض واپس نہیں کیا گیا، نواز شریف کے وزیرِ اعظم بنتے ہی قرض معاف کروا لیا گیا، شریف فیملی نے آج تک کسی تحقیقاتی ادارے کو کاغذات نہیں دیے۔

یہ بھی پڑھیئے: 28 ارب وفاق کو دیے جائیں، شہزاد اکبر کی درخواست

شہزاد اکبر نے مزید کہا کہ نیو اسلام آباد ایئر پورٹ کے ٹھیکوں میں شامل ایک کمپنی سے چوہدری شوگر ملز کو پیسے منتقل کیے گئے۔