’انشاءاللّہ’ لالا‘ جلد صحتیاب ہوجائیں گے‘

14 جون ، 2020

کورونا وائرس کا شکار ہونے والے پاکستان کرکٹ ٹیم کے سابق کپتان شاہد آفریدی کی جلد صحتیابی کے لیے قومی کرکٹرز دعاگو ہیں۔

مائیکرو بلاگنگ سائٹ ٹوئٹر پر پاکستان کے سابق فاسٹ بولر شعیب اختر نے شاہد آفریدی کی صحتیابی کے لیے دعائیہ پیغام جاری کرتے ہوئے لکھا کہ ’لالا جس طرح آپ ہر مقابلے میں جیت جاتے ہو اِسی طرح آپ اس وائرس کو بھی شکست دیں گے اور جلد ہی ٹھیک ہوجائیں گے۔‘

پاکستان کرکٹ ٹیم کے سابق کپتان، سینئیر پلیئر اور آل راؤنڈر شعیب ملک نے اپنے ٹوئٹ میں لکھا کہ ’شاہد بھائی ہمارے ملک کے لیے آپ کی جو بھی خدمات ہیں وہ ہمیشہ ہمارے دلوں میں یاد رہیں گی۔‘

شعیب ملک نے لکھا کہ’آپ ایک فائٹر ہیں اور انشاءاللّہ آپ اس عالمی وبا سے بھی جیت جائیں گے اور بہت جلد صحتیاب ہوجائیں گے، میری ساری دُعائیں آپ کے ساتھ ہیں۔‘

قومی کرکٹر احمد شہزاد نے اپنے ٹوئٹ میں شاہد آفریدی کو مخاطب کرتے ہوئے لکھا کہ ’اس مشکل گھڑی میں آپ نے پاکستان کی عوام کے لیے جو بھی کیا ہے اس سے مجھے یقین ہے کہ آپ بہت جلد صحتیاب ہوجائیں گے کیونکہ اُن تمام لوگوں کی دعائیں آپ کے ساتھ ہیں جن کی آپ نے مدد کی۔‘

قومی کرکٹ ٹیم کے فاسٹ بولر حسن علی نے بھی اپنے ٹوئٹ میں شاہد آفریدی کی جلد صحتیابی کے لیے دُعا کی۔

ان قومی کرکٹرز کے علاوہ اظہر علی، وہاب ریاض، شرجیل خان، عماد وسیم اور عمر امین سمیت دیگر کھلاڑیوں نے بھی شاہد آفریدی کی صحتیابی کے لیے دعائیہ پیغامات جاری کیے ہیں۔

یاد رہے کہ شاہد آفریدی لاک ڈاؤن کے آغاز سے فلاحی کاموں میں مصروف رہے، انہوں نے ملک کے مختلف علاقوں میں عوام میں راشن اور دیگر سامان تقسیم کیا تھا۔

اُنہوں نے گزشتہ روز مداحوں کو اپنے کورونا ٹیسٹ کے نتائج سے آگاہ کرتے ہوئے اپنے ٹوئٹ میں لکھا تھا کہ جمعرات سے اُن کی طبیعت ناساز تھی جس کے بعد اُنہوں نے اپنا کورونا ٹیسٹ کروایا جو کہ مثبت آیا۔

تازہ ترین