فرمان الہی
نماز کے اوقات
اپوزیشن کی سب سے بڑی جماعت مسلم لیگ (ن) کے رہنما امیر مقام نے وزیراعظم عمران خان کو پاکستان کے سیکیورٹی رسک قرار دیدیا۔
صوابی میں پارٹی کنونشن سے خطاب میں ن لیگ کے سینئر رہنما امیر مقام نے کہاکہ پی ٹی آئی کا دور حکومت تاریخ کا سیاہ ترین دور ہے، عوام نے ان کے دور میں کوئی خوشخبری نہیں سنی، ان کا ایجنڈا ہے کہ دوسرے کو ڈاکو اور چور کہنا ہے۔
انہوں نے دوران خطاب وزیراعظم عمران خان اور نوازشریف کے سابقہ دور حکومت کے حوالے سےکہا کہ موجودہ اور اس سے پہلے کی حکومت میں بنیادی فرق یہ ہے کہ پی ٹی آئی کے لوگ جھوٹ بولتے اور یوٹرن لینے کے ماہر ہیں جبکہ نواز شریف کو اچھی ٹیم ملی اور ایک اچھا بھائی ملا۔
انہوں نے وزیراعظم عمران خان کو سیکیورٹی رسک قرار دیتے ہوئے کہا کہ صوبہ خیبرپختونخوا والے 7 سال سے عذاب دیکھ رہے ہیں، پی ٹی آئی والے دن کے 12 بجے کہتے ہیں رات کے 12 بج رہے ہیں۔
امیر مقام نے یہ بھی کہا کہ جیلوں میں ڈالنے سے نقصان مسلم لیگ ن کا نہیں پوری عوام کا ہوا ہے، یہ جتنی تختیاں لگاتے ہیں یہ مسلم لیگ ن کی حکومت کے دور کے منصوبے ہیں۔
ان کا کہنا تھا کہ شہباز شریف نے کمر درد کے باجود مشین کی طرح کام کیا، اسحاق ڈار نے 5 سال ڈالر کو کنٹرول میں رکھا۔
ن لیگی سینئر رہنما نے کہا کہ میرا جرم یہ ہے کہ ہمیشہ پاکستان کے لئے کام کیا، میرے بیٹے کو جعلی مقدمہ میں جیل میں ڈال دیا گیا، یہ بھول جائیں آپ کے دبانے سے ہم دب جائیں گے۔
انہوں نے پی ٹی آئی قیادت سے استفسار کیا کہ ہمارے ساتھ ایسا کرنے سے آپ کو کیا ملا؟ عوام تو فاقوں سے مجبور ہوگئے ہیں۔
