• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

والدہ کی وفات پر اہلیہ تہمینہ درانی کا شہباز شریف کو حوصلہ

پاکستان مسلم لیگ نون کے صدر میاں محمد شہباز شریف کی اہلیہ تہمینہ درانی نے شہباز شریف کی والدہ بیگم شمیم اختر کی وفات پر شوہر کو حوصلہ دے دیا۔

تہمینہ درانی نے انے ٹوئٹر اکاؤنٹ پر جاری پیغام میں شہباز شریف کی اپنی والدہ سے آخری ملاقات کی ایک یادگار تصویر شیئر کرتے ہوئے ’آخری الوداعی لمحہ‘ لکھا۔

انہوں نے اپنے پیغام میں یہ بھی لکھا کہ ’میں تعزیت کیلئے شوہر شہباز شریف سے رابطہ کرنے سے قاصر ہوں۔‘

یاد رہے کہ سابق وزیراعظم نواز شریف کی والدہ بیگم شمیم اختر طویل علالت کے بعد انتقال کرگئیں، رہنما (ن) لیگ عطاء اللہ تارڑ نے نواز شریف کی والدہ کے انتقال کی تصدیق کی۔


سابق وزیر اعظم نواز شریف اور سابق وزیر اعلی پنجاب میاں شہباز شریف کی بہن کوثر اپنی والدہ بیگم شمیم اختر کی میت کو لے کر دو سے تین روز میں لندن سے پاکستان روانہ ہوں گی۔

نواز شریف کی والدہ شدید علالت کے باوجود فروری میں لندن روانہ ہوئی تھیں، ڈاکٹروں نے انہیں طویل سفر سے منع کیا تھا لیکن انہوں نے اپنے بیٹے کے پاس جانے کا کہا۔ نواز شریف اور شہباز شریف کی والدہ بیگم شمیم اختر کی عمر تقریبا 90 سال تھی جب کہ ان کے خاوند میاں محمد شریف کا 2004ء میں جدہ میں انتقال ہوا تھا۔

دوسری جانب شہباز شریف اور حمزہ شہبا کو پے رول پر رہا کرنے کی ہدایات جاری کردی گئیں ہیں۔

فیاض الحسن چوہان کا کہنا تھا کہ شہباز شریف اور حمزہ شہباز کو قانون کے مطابق بیگم شمیم اختر کی تدفین میں شرکت کے لیے پے رول پر فوری رہا کیا جائے گا۔ ان کی پے رول پر رہاِئی کے لیے ہدایات جاری کردی گئیں ہیں۔ ان کی پے رول پررہائی قانون کے مطابق ہوگی۔

قومی خبریں سے مزید