بجلی کے طویل بریک ڈاؤن پر گدو کے 7 ملازمین معطل

بجلی کے طویل بریک ڈاؤن پر سینٹرل پاور جنریشن کمپنی لمیٹڈ (سی پی جی سی ایل) گدو کے 7 افسران و ملازمین کو معطل کردیا گیا ہے۔

میڈیا رپورٹ کے مطابق سی پی جی سی ایل گدو کے چیف ایگزیکٹو آفیسر (سی ای او) نے گدو کے 7 افسران اور ملازمین کو ڈیوٹی میں غفلت پر معطل کیا ہے۔

سی ای ای کے آفس سے جاری آرڈر کے مطابق مذکورہ ملازمین کی ڈیوٹی میں غفلت کے باعث ملک میں بجلی کا طویل بریک ڈاؤن ہوا ہے۔

سی پی جی سی ایل کے سی ای او کے آرڈر کے مطابق معطل کیے گئے افسران میں ایڈیشنل پلانٹ منیجر سہیل احمد، جونیئر انجینئر دیدار علی چنا، فور مین علی حسن گولو، آپریٹر ایاز حسین ڈاہر ، سید احمد، اٹینڈنٹ سراج احمد میمن اور الیاس شامل ہیں۔

حکمنامے کے مطابق تمام معطل ملازمین اس دوران پاور ہاؤس کے مین گیٹ پر ڈپٹی منیجر سیکیورٹی کی نگرانی میں حاضری لگائیں گے جبکہ معطل افسران سی ای اوکے دفتر میں حاضری لگائیں گے۔

ملک بھر میں ہفتہ اور اتوار کی درمیانی شب بجلی کے ترسیلی نظام میں خرابی کے باعث ملک بھر میں بجلی کی فراہمی معطل ہوگئی۔

مفتاح اسماعیل کا بجلی بریک ڈاؤن پر پی ٹی آئی حکومت سے سوال

سابق وزیر خزانہ اور ن لیگ کے سینئر رہنما مفتاح اسماعیل نے بجلی کے طویل بریک ڈاؤن پر پی ٹی آئی حکومت سے سوال پوچھ لیا۔

آج شام میں نیشنل ٹرانسمیشن اینڈ ڈسپیچ کمپنی (این ٹی ڈی سی) نے اعلامیے جاری کیا اور ملک بھر میں ترسیلی نظام کی بحالی کا اعلان کیا ۔

اس سے قبل وزیر توانائی عمرایوب میڈیا سے گفتگو میں کہہ چکے ہیں کہ اتوار کی رات 11 بج کر 41 منٹ پر گدو پاور پلانٹ میں خرابی پیدا ہوئی اور اس کے بعد سسٹم نے خود کو بند کرنا شروع کردیا۔

بجلی کے طویل بریک ڈاؤن کے باعث ملک بھر میں رات بھر بجلی کی فراہمی معطل رہی اور اتوار کی صبح سے ملک بھر میں بجلی کی فراہمی مرحلہ وار شروع ہوئی ۔