کورونا ویکسین کے حصول اور ویکسی نیشن مہم کی منصوبہ بندی کی جائے، پی ایم اے

پاکستان میڈیکل ایسوسی ایشن نے حکومت پاکستان سے کورونا ویکسین کے حصول کے عمل کو تیز کرنے اور ویکسینیشن مہم کی منصوبہ بندی کرنے کا مطالبہ کیا ہے۔

پاکستان میڈیکل ایسوسی ایشن انے اپنے بیان میں کہا کہ اب تک دنیا کے بہت سے ممالک میں کورونا ویکسین لگنا شروع ہوچکی ہے۔ 

بھارت نے بھی دنیا کی سب سے بڑی کورونا وائرس ویکسین مہم شروع کردی ہے، جبکہ پاکستان کو کومکس کی جانب سے مفت ویکسین کی پہلی کھیپ دوسری سہ ماہی میں ملنے کا امکان ہے، لیکن حکومت کی جانب سے ویکسین لگانے کی کوئی منصوبہ بندی سامنے نہیں آئی۔

پی ایم اے نے مطالبہ کیا ہے کہ حکومت کووڈ ویکسین کے حصول کے عمل کو تیز کرے، ویکسین مہم کی منصوبہ بندی فوری شروع کردینی چاہئے جبکہ ویکسی نیشن مہم کے پہلے فیز کی تیاری بھی مکمل ہوجانا چاہئے۔ پی ایم اے نے مطالبہ کیا سرکاری و نجی اداروں سے منسلک صحت کے کارکنوں کو ترجیحی بنیادوں پر ویکسین لگانا چاہیے۔