پی ڈی ایم پاپا ڈیڈی مولانا بچاؤ مہم ہے، حلیم عادل شیخ

09 فروری ، 2021

پاکستان تحریک انصاف (پی ٹی آئی) کے رکن سندھ اسمبلی حلیم عادل شیخ کہتے ہیں کہ پاکستان ڈیموکریٹک موومنٹ (پی ڈی ایم) پاپا ڈیڈی مولانا بچاؤ مہم ہے۔

حلیم عادل شیخ نے سندھ اسمبلی میں میڈیا سے بات کرتے ہوئے کہا کہ آج حیدرآباد میں ایک ناکام جلسہ ہونے جارہا ہے، پی ڈی ایم کے غبارے سے ہوا نکل چکی ہے۔

اُنہوں نے کہا کہ سندھ کے سارے شہر کچرا کنڈی بن چکے ہیں جبکہ ناکام سیاستدانوں کا ٹولہ حیدرآباد میں سرکس لگانے جارہے ہیں۔

حلیم عادل شیخ نے یہ بھی کہا کہ 2 اکتوبر کو نعرہ لگا آر یا پار مگر آر ہوا نہ پار، سیاسی جلسوں کیلیے گاڑیوں کا کرایہ ڈپٹی کمشنر دے رہے ہیں۔

اُنہوں نے سوال اُٹھایا کہ 7880 ارب روپے میں سندھ کے عوام اور ترقی کے لیے کیا کیا؟

پی ٹی آئی رہنما نے کہا کہ بلاول زرداری قلابازی کھانے سے کچھ نہیں ہوگا، وزیر اعلیٰ سندھ سید مراد علی شاہ کو بھی جواب دینا ہوگا۔

حلیم عادل شیخ نے یہ بھی کہا کہ شہر قائد کچرا کنڈی بنا ہوا ہے، سندھ میں ریاستی دہشت گردی ہو رہی ہے، اسپتالوں کا برا حال ہے۔

اُن کا کہنا تھا کہ پی ڈی ایم کی ناکامی کی وجہ دوسروں پر الزامات لگانا ہے، پی ڈی ایم کے ساتھ عوام نہیں ہے۔

حلیم عادل شیخ نے مسلم لیگ نون کی نائب صدر کو آڑے ہاتھوں لیتے ہوئے کہا کہ مریم نواز کی بات کو کوئی سنجیدہ نہیں لیتا، لاہور مریم کے والد کا ہوم گراؤنڈ ہے لیکن وہاں بھی اُنہیں ناکامی ہوئی۔

اُن کا مزید کہنا تھا کہ مریم کے والد اور چچا نے ساری زندگی جھوٹ بولا ہے۔

واضح رہے کہ حیدرآباد میں اپوزیشن اتحاد پی ڈی ایم کے جلسے کی تیاریاں، مختلف مقامات پر استقبالیہ کیمپ قائم کردیے گئے۔