بلاول 3 بار امریکا جائیں، عمران 5سال پورے کرینگے: شیخ رشید

10 جولائی ، 2021

وفاقی وزیرِ داخلہ شیخ رشید احمد کا پاکستان پیپلز پارٹی کے چیئرمین کے متعلق کہنا ہے کہ ایک بار نہیں بلاول بھٹو زرداری 3 بار امریکا جائیں، وزیرِ اعظم عمران خان 5 سال پورے کریں گے۔

راول پنڈی میں میڈیا سے گفتگو کرتے ہوئے وفاقی وزیرِ داخلہ شیخ رشید احمد نے کہا کہ ہم افغانستان میں امن کے خواہش مند ہیں، افغانستان کے لوگ جو فیصلہ کریں گے وہ ہمیں قبول ہو گا۔

انہوں نے کہا کہ اپنی سر زمین کو کسی کے خلاف استعمال نہیں ہونے دیں گے، آرمی چیف خود امن کے لیے اقدامات کر رہے ہیں، ویکسینیشن والے لوگوں کیلئے طورخم بارڈر کھلا ہے۔

شیخ رشید احمد نے کہا ہے کہ پی ڈی ایم ختم ہو چکی ہے، آزاد کشمیر الیکشن کے بعد اپوزیشن اور حکومت کے تعلقات ٹھیک ہوں گے۔

انہوں نے کہا کہ آزاد کشمیر میں حکومت ان شاء اللّٰہ عمران خان ہی بنائیں گے، عمران خان کے ساتھ خود بھی کشمیر میں مہم پر جاؤں گا۔

وفاقی وزیرِ داخلہ نے کہا کہ نالہ لئی منصوبہ 3 سال میں مکمل ہو رہا ہے، غریب لوگوں کی تقدیر بدلی جا رہی ہے۔

انہوں نے مزید کہا کہ وزیرِ اعلیٰ پنجاب عثمان بزدار سے بات ہو گئی، وقار النساء کالج کو اسی ماہ یونیورسٹی بنا دیں گے۔

شیخ رشید کا یہ بھی کہنا ہے کہ 5 اگست کا قانون واپس لیے جانے تک بھارت سے کوئی بات نہیں ہو گی، وزیرِ اعظم عمران خان نے مقبوضہ کشمیر کا کیس اقوام متحدہ سمیت دنیا بھر میں اٹھایا ہے۔

تازہ ترین